O Centro Singular de Investigación en Química Biolóxica e Materialis Moleculares (CiQUS) da Universidade de Santiago de Compostela (USC) acaba de ser distinguido como Unidade de Excelencia María de Maeztu, segundo a resolución provisional da convocatoria do Ministerio de Ciencia, Innovación e Universidades. Este recoñecemento, que implica un financiamento aproximado de tres millóns de euros para os próximos catro anos, reforza a posición do CiQUS como referente na fronteira entre a química, a bioloxía e a ciencia de materiais, áreas nas que o centro desenvolve solucións innovadoras para retos globais en saúde, enerxía e tecnoloxías sostibles.
Desde a súa creación en 2010, o CiQUS consolidou un modelo de investigación interdisciplinar de alto impacto, integrado actualmente por 19 grupos de investigación e unha destacada capacidade de captación de fondos competitivos. O centro conta ademais co recoñecemento CIGUS da Xunta de Galicia e recibe apoio financiero da Unión Europea a través do Programa Galicia FEDER 2021-2027.
A súa actividade científica abarca áreas como o deseño de materiais funcionais, a química biolóxica e o desenvolvemento de novas metodoloxías sintéticas. Esta traxectoria compleméntase cunha firme aposta pola formación e a atracción de talento investigador, reflectida na obtención de 19 proxectos do Consello Europeo de Investigación (ERC) —ata 13 investigadores e investigadoras do CiQUS recibiron o apoio deste prestixioso organismo europeo— e na participación do centro en iniciativas impulsadas polo European Innovation Council (EIC), orientadas a acelerar a transferencia de coñecemento e o desenvolvemento de tecnoloxías disruptivas.
A reitora da USC, Rosa Crujeiras, manifestou: “O orgullo que temos que ter como comunidade universitaria por ter conseguido esta terceira María de Maeztu, que recoñece a investigación de fronteira que se fai na nosa Universidade pública”. Á súa vez, quixo agradecer o traballo e esforzo científico en todos estes anos “das persoas que conforman o CiQUS e que permitiron a consecución deste noivo recoñecemento para a USC”. Pola súa banda, os directores do centro destacaron que este recoñecemento “supón un impulso decisivo para seguir avanzando na misión de abordar grandes desafíos científicos desde unha perspectiva innovadora e colaborativa, co obxectivo de xerar un impacto real na sociedade”.
A acreditación María de Maeztu permitirá ao CiQUS reforzar a súa estratexia científica e institucional, aumentar a súa proxección internacional e potenciar a atracción de novo talento investigador. Así mesmo, contribuirá a consolidar boas prácticas na xestión da investigación e a fortalecer a capacidade do centro para liderar proxectos de excelencia a escala global.
Tres centros da USC con este recoñecemento
Son xa tres os centros da USC que contan con este recoñecemento ministerial e que dan mostra do seu gran potencial investigador de vangarda. O Instituto Galego de Física de Altas Enerxías (IGFAE) convertérase en 2017 no primeiro instituto galego que a ostentaba, concesión que revalidou en 2023; e a ela sumouse o pasado ano o Centro Singular de Investigación en Medicina Molecular e Enfermidades Crónicas da USC (CiMUS).
