Únete á nosa canle de Whatsapp
O telescopio espacial máis potente da historia, o James Webb (JWST), do que onte se coñecían as primeiras imaxes a toda cor capturadas no universo máis afastado, revela agora unha nova e sorprendente imaxe do planeta Xúpiter no seu maior esplendor. Estas imaxes, tomadas mentres se probaba Webb, incluíronse no informe de posta en marcha do telescopio. As imaxes mostran a Xúpiter e os seus aneis, así como a tres das súas lúas: Europa, Teba e Metis. Tamén se ve a sombra de Europa na imaxe da esquerda, xusto á beira da Gran Mancha Vermella do planeta.
O telescopio, que naceu co obxectivo de mostrar o nunca visto, retratou nas imaxes publicadas onte un cúmulo de galaxias denominado SMACS 0723. Tal e como explica para GCiencia o físico José Edelstein, investigador do Instituto Galego de Física e Altas Enerxías (IGFAE), o que captura Webb é a luz do cúmulo de galaxias emitida cando aínda non existía o Sistema Solar. Isto permite coñecer os procesos de formación estelar das primeiras galaxias.
Imaxes con cámara de luz infravermella
As imaxes foron tomadas a través dunha cámara que captura a luz infravermella (NIRCam), utilizando dous filtros diferentes que resaltan as lonxitudes de onda de luz separadas, unha curta e outra longa. Formaron parte da proba que consistiría en garantir que Webb puidese rastrexar obxectos que se moven rápidamente a través do Sistema Solar. Para isto o telescopio fotografou nove obxectivos e Xúpiter foi o que se moveu máis lentamente. A proba tamén mostrou que é posible usar o James Webb para capturar detalles como lúas e aneis ao redor dun planeta tan brillante como Xúpiter.
Os achados demostran que Webb será útil para rastrexar elementos do universo como cometas e obxectos próximos á Terra
“Esperábase que observar un planeta brillante, como Xúpiter e os seus satélites e aneis fose todo un desafío, debido á luz dispersa que pode afectar á precisión do instrumento científico empregado. Ademais o sensor de guía fina tamén debe rastrexar as estrelas guía preto do planeta brillante en cuestión”, explica o informe de posta en servizo. “Estas observacións verificaron a expectativa que tiñamos”, engaden os expertos.
Todas estas boas noticias significa que Webb será útil para rastrexar elementos do universo como cometas e obxectos próximos á Terra. En xeral, o informe de posta en marcha mostra que James Webb está a funcionar mesmo mellor do esperado. “Os resultados acadados son clave, despois de seis meses dende a súa posta en marcha, pois demostran que o telescopio é totalmente capaz de lograr os obxectivos para os que foi construído. James Webb foi concibido para permitir avances fundamentais na nosa comprensión da formación e evolución de galaxias, estrelas e sistemas planetarios”, escriben os autores no informe. “Agora sabemos con certeza que o fará”, conclúen.
