Xoves 22 Febreiro 2024

As novas imaxes do James Webb mostran exoplanetas, galaxias e espectaculares nebulosas

O telescopio máis potente da historia revela catro novas fotografías, as máis nítidas e detalladas do universo

Coñecer detalladamente o universo. Ser capaz de admirar cada recuncho, incluso os máis afastados. Ser quen de observar as primeiras galaxias que se formaron despois do Big Bang. E un longo etcétera de obxectivos que persegue o James Webb, o telescopio máis potente da historia. A súa primeira imaxe, revelada onte, mostraba o cúmulo de galaxias SMACS 0723 como nunca antes se vira. E agora, a NASA vén de mostrar outras catro imaxes tan sorprendentes como impactantes. Todas elas xa forman parte da historia da ciencia: son as primeiras que captura o James Webb.

Nebulosa de Carina

O telescopio abre todo un universo de posibilidades e é capaz de explorar e fotografar o nunca visto. Un dos obxectivos das dúas imaxes foi a Nebulosa de Carina, unha das máis grandes de brillantes do ceo. A foto leva por título Cosmic Cliffs pola súa semellanza con montañas e cantís. O que se pode ver na instantánea son viveiros estelares emerxentes e estrelas individuais descoñecidas ata o de agora. Isto demostra, unha vez máis, que os instrumentos do James Webb son capaces de mirar a través do po cósmico. A nebulosa está situada a uns 7.600 anos luz de distancia. Segundo a NASA, alberga moitas estrelas masivas, varias veces máis grandes que o sol. Esta imaxe, que realmente só retrata un dos seus bordes, será clave para entender os procesos de formación estelar.

Publicidade

WASP-96b (espectro)

Outro dos grandes fitos do James Webb que se deron a coñecer esta tarde foi o espectro do exoplaneta WASP-96 b, un planeta xigante que se atopa fóra do Sistema Solar e está composto principalmente de gas. Está situado a case 1.150 anos luz da Terra e orbita a súa estrela cada 3,4 días. Agora, grazas ao telescopio, deuse a coñecer o espectro de luz deste exoplaneta, que contén información sobre a composición da atmosfera do planeta. As evidencias do Webb apuntan a unha firma distinta de auga, así como indicios de néboas e nubes que non detectaron outros estudos.

Nebulosa do Anel Sur

O Anel Sur, ou a nebulosa de “Oito Estalidos”, é unha nebulosa planetaria. É dicir, unha nube de gas en expansión que rodea unha estrela moribunda. Ten case medio ano luz de diámetro e atópase aproximadamente a 2.000 anos luz da Terra. Grazas ao James Webb acaban de coñecerse novos detalles que permitirán estudar e comprender mellor como evolucionan as estrelas e como se transforman as súas contornas. Así mesmo, esta imaxe tamén revela unha gran cantidade de puntos de luz multicor. Dende a NASA confirman que non son estrelas, senón galaxias.

Quinteto de Stephan

A uns 290 millóns de anos luz de distancia, o Quinteto de Stephan atópase na constelación de Pegaso. Destaca por ser o primeiro grupo compacto de galaxias, descuberto en 1877. Catro das cinco galaxias dentro do quinteto están atrapadas nunha danza cósmica de repetidos encontros. Agora, o James Webb ofrece unha imaxe nunca vista destes obxectos cósmicos. Segundo a NASA, isto permitirá entender mellor as fusións entre galaxias, a formación de estrelas e as alteracións de gas. Ao parecer, este tipo de agrupacións galácticas puideron ser máis comúns no universo primitivo, cando o material puido estar alimentado por buratos negros moi enerxéticos.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Seis imaxes que cambiaron a historia da ciencia

https://theconversation.com/javascripts/lib/content_tracker_hook.js *Un artigo de O ser humano empregou primeiro o debuxo e...

Unha paisaxe invernal en Marte? Esta imaxe demostra que non todo é o que parece

A misión espacial Mars Express ofrece unha espectacular fotografía do cráter Korolev para conmemorar os quince anos en órbita no planeta vermello

LIA (2), pioneiros galegos no desenvolvemento da intelixencia artificial na astronomía

O grupo da UDC recibiu o Premio Spin-Off PuntoGal na edición 2023 pola súa traxectoria de éxito

Envía o teu nome a Xúpiter nunha misión espacial da NASA

Dende a axencia lanzarán unha botella que leva tamén un poema da escritora estadounidense Ada Limón