A NASA (Administración Nacional de Aeronáutica e o Espazo) pon a disposición do usuario unha ferramenta interactiva en liña que permite recrear nomes, palabras ou frases con imaxes da Terra tomadas dende satélites. Este programa, denominado Your name in Landsat, publicouse inicialmente en agosto de 2024 para o Campamento Landsat, un encontro virtual de verán xestionado pola axencia. O centro espacial Kennedy compartiu de novo a web para conmemorar o Día da Terra, unha efeméride que se celebra en abril.
Your name in Landsat é un portal web de acceso gratuíto que non require rexistros. Esta ferramenta admite o uso de letras, pero non é posible inserir números o símbolos. Permite ver diferentes variacións do texto redactado —pois cada letra ten múltiples imaxes asociadas— ao pulsar a opción Enter varias veces.
Este proxecto serve como achegamento da ciencia espacial a un público que podería percibir que esta é unha realidade afastada, pero que, dun xeito ou doutro, está presente en toda a contorna.
O programa Landsat
As fotografías tomadas forman parte do amplo arquivo de Landsat, un programa coordinado pola NASA e o USGS (Servizo Xeolóxico dos Estados Unidos) que ofrece o rexistro espacial continuo máis antigo en existencia sobre a superficie terrestre.
A misión Landsat comezou o 23 de xuño de 1972, máis de 50 anos atrás, e, dende entón, logrou completar oito lanzamentos de satélites exitosos. Os datos de Landsat monitorean a evolución da superficie da Terra e, en consecuencia, permiten tomar decisións informadas sobre os recursos e a contorna.
