O estudo liderado por Mariano Barbacid no que se anunciaba a eliminación por completo do cancro de páncreas en ratos é retirado da revista da Academia Nacional de Ciencias de Estados Unidos (PNAS). Os editores retractan este artigo debido ao interese competitivo relevante, oculto no momento da presentación. O autor e os dous coautores, Vasiliki Liaki e Carmen Guerra, teñen intereses financeiros da empresa Vega Oncotargets, destinada a desenvolver novas terapias contra esta enfermidade.
Barbacid, como membro da Academia estadounidense, tiña dereito a publicar os seus traballos pola vía rápida, cunha revisión máis laxa, tal e como informa El País. A investigación publicouse en xaneiro e, tres meses despois, a falta de declaración de conflitos de interese é o motivo principal do rexeitamento do artigo por esta publicación científica internacional.
“Os membros da academia que teñen un interese competitivo, financeiro ou doutro tipo, que podería ser visto que inflúe significativamente na súa obxectividade ou como a creación dunha vantaxe competitiva inxusta para calquera persoa ou organización vinculada á investigación, deben presentar o seu traballo como presentación directa“, lembran dende PNAS, informando sobre a súa liña editorial.
O grupo do Centro Nacional de Investigacións Oncolóxicas (CNIO) foi pioneiro cunha estratexia que consiste en bloquear a acción do oncoxene KRAS en tres puntos, no canto de só nun. Despois de eliminar xeneticamente tres moléculas da vía de sinalización de KRAS en modelos de rato, os tumores desapareceron de maneira permanente.
