Malas noticias para a comunidade astronómica e os afeccionados ás chuvias de estrelas: este ano, o mellor momento para gozar das Oriónidas coincidirá no ceo cunha Lúa case chea, que dificultará moito a súa visión. Ademais, segundo Mario Tafalla, astrónomo do Observatorio Nacional de Astronomía, tampouco será un evento moi intenso: durante o seu pico de actividade, o máximo que se espera ver é unha cifra de tan só 20 meteoros por hora.
Cada ano, o noso planeta cruza dúas veces a órbita do cometa Halley, dando lugar a dous episodios de chuvias de estrelas, unha delas en maio —que corresponde coas Eta Acuáridas— e as Oriónidas, entre os meses de setembro e outubro. Neste caso, o paso polos nosos ceos deste segundo evento será máis evidente na noite entre o 21 e o 22 de outubro.
Malas condicións para a observación
Segundo indica Tafalla, as condicións para a observación non serán as mellores este 2024: “Atopámonos nun momento no cal a Lúa estará case chea, aínda que xa minguando, o cal dificultará moito a súa visión polo propio brillo deste corpo celeste“. O astrónomo fai referencia á ausencia de contrastes no ceo: canto máis brillo, máis difícil identificar os meteoros.
Aínda así, e como sempre, hai unha serie de indicacións para os afeccionados que queiran tentar seguir a pegadas das Oriónidas. O primeiro é identificar cal será a franxa horaria de maior actividade: este ano, corresponderase coas primeiras horas de escuridade. Ademais, subliña, “unha boa opción é situarse dando as costas á Lúa para evitar na medida do posible o seu brillo”.
O nome desta chuvia de estrelas fai unha clara referencia ao lugar onde semellan converxer: a constelación de Orión, que pode ser localizada no ceo da maneira moi sinxela grazas ás tres estrelas tan características que a compoñen.
De igual xeito, afastarse das contornas urbanas, con maior contaminación luminosa, axudará a eliminar calquera fonte de luz artificial que poida dificultar a observación dos meteoros. E, nesta época do ano, outra obrigación: levar roupa de abrigo. Para a noite do luns, segundo MeteoGalicia, agárdanse ceos parcialmente cubertos na totalidade da comunidade, cun descenso moderado das temperaturas pola chegada dunha fronte activa.
