Xa pasaron as chuvias de estrelas das Perseidas, das Líridas e das Dracónidas. Agora, as que temos máis próximas no calendario son as Xemínidas, unha das chuvias de meteoros máis activas do ano segundo o Instituto Xeográfico Nacional. Con máis de 120 meteoros por hora e unha velocidade próxima aos 35 km/s durante varios días, o seu pico de actividade terá lugar na noite do 13 ao 14 de decembro, con máximo arredor das 9:00 horas. A Lúa, en fase minguante, sairá cara as 3 da madrugada, polo que o ideal será intentar observalas antes desa hora.
No hemisferio norte, estes fragmentos poden verse entre o 4 e o 17 de decembro. Nas latitudes próximas a 40o N, como Ourense, o radiante permanece sobre o horizonte dende aproximadamente unha hora despois do solpor e ata o amencer.
O bo tempo en Galicia favorecerá a súa observación na maior parte da comunidade, con ceos despexados, agás na Costa da Morte e a Mariña lucense, onde se agardan máis nubes.
Unha chuvia de estrelas peculiar
A orixe desta chuvia de estrelas é o asteroide Faetón, identificado en 1983 polo telescopio IRAS. Antes desa data non estaba asociado ningún cometa, e precisamente aí radica a súa maior singularidade, xa que a maioría das chuvias de meteoros proceden de cometas.
Na actualidade, os astrónomos seguen a debater sobre a súa verdadeira natureza. Unha das hipóteses é que Faetón sexa un cometa extinto e que os fragmentos que dan lugar ás Xemínidas se desprendesen hai séculos, cando o obxecto celeste aínda presentaba actividade cometaria.
Que facer para velas?
Partindo da previsión meteorolóxica de MeteoGalicia, xa contamos cunha boa base para a observación. Como en calquera chuvia de estrelas, o máis importante é buscar un lugar cun ceo escuro e poucos obstáculos no horizonte. Non son necesarios instrumentos ópticos, como prismáticos, xa que poden reducir o campo de visión. Durante esta fin de semana, coincidindo co pico de actividade, o IXN recomenda colocarse de costas á Lúa para evitar que o seu brillo cegue e dificulte a observación dos meteoros.
