Agosto chega a Galicia cunha nova vaga de calor. Segundo informa elTiempo.es, trátase da segunda que afecta ao país neste verán e que tamén deixará pegada na comunidade. A calor diúrna pode ser agradable: quen non goza dun día de sol e praia? Con todo, as noites tropicais, como a deste domingo, resultan máis difíciles de soportar. As temperaturas superaron os 30 graos en Corrubedo, Marín e Pontevedra, afectando ao descanso de quen non conta con aire acondicionado.
Os datos de Meteogalicia amosan que outros puntos do sur e do oeste tamén rexistraron valores moi altos durante a noite, sitúandose entre os 26 e 27 graos. Vigo alcanzou os 28°C ás 23:00 horas e A Lanzada chegou aos 28,6°C.
O culpable? Unha masa de aire moi cálida de orixe norteafricana que eleva as temperaturas ata valores extremos en Galicia. Ademais, a ausencia de vento incrementa a sensación térmica.
Pola contra, no norte as condicións son moito máis frescas: A Coruña quedou nos 20,7°C, Burela nos 16,6°C e Malpica nos 16,4 graos. No interior, Guitiriz rexistrou 14,9°C. Esta marcada diferenza débese ao vento do nordés, que refresca a metade norte de Galicia mentres a sur sofre o calor intenso.
Días calurosos e noites tropicais
As xornadas de altas temperaturas convertéronse na tónica do verán galego nos últimos días. Leiro (Ourense) rexistrou o domingo a máxima de Galicia, con 40,3°C durante o día e 25,6°C ás once da noite, o que supón unha amplitude térmica de 14,7°C.
O máis destacable é que os seguintes tres valores máis altos non se produciron en Ourense, senón na provincia de Pontevedra, menos habituada a este tipo de calor sofocante. Salvaterra do Miño acadou os 39,6°C, Arbo quedou en 39,5°C e Ponteareas chegou aos 39,4°C.
Suba de niveis dos alerta por calor
As altas temperaturas que afectaron a Galicia onte, incluso durante a madrugada, deixaron no mapa de niveis de risco para a saúde do Ministerio de Sanidad unha ampla mancha de zonas en cor laranxa e vermella. As áreas con risco baixo ou nulo limítanse á Mariña lucense, ao oeste da Coruña e ao centro de Lugo.
O domingo, a Xunta de Galicia elevou ao nivel de alerta 2 a zona litoral e o Miño de Pontevedra debido ás súas altas temperaturas, que hoxe se manteñen en risco alto segundo o mapa de Meteosalud. O sur de Ourense e Valdeorras tamén se suman á cor vermella.
De feito, a calor extrema obrigou a suspender actividades deportivas ao aire libre: un total de 27 concellos das Rías Baixas e 16 do interior da provincia de Pontevedra cancelaron eventos previstos a partir das 13:00 horas por risco para a saúde.
Mentres, o resto da comunidade permanece en risco medio, polo que se recomenda hidratarse con frecuencia, manter espazos frescos e evitar a exposición directa ao sol nas horas centrais do día. O Ministerio de Sanidad advirte, ademais, que algunhas zonas actualmente en nivel 2 poderían pasar a nivel 3 nos próximos días, como o interior da Coruña.
Vaga de calor ata o xoves
Como informa o portal meteorolóxico elTiempo.es, entre o luns e o martes as temperaturas poderán superar os 40 graos en distintas zonas de Galicia, como xa ocorreu onte.
Deste xeito, o martes 5 de agosto podería converterse no día máis cálido deste episodio que, segundo as previsións, podería prolongarse ata o mércores e mesmo ata o venres. A súa evolución dependerá da persistencia da masa de aire cálida, cuxa retirada aínda é incerta.
Pola súa parte, os técnicos de MeteoGalicia apuntan que esta calor continuará nos próximos días, cun pequeno descanso o xoves, pero cunha nova intensificación da calor durante a fin de semana.
