Galicia vivirá nas vindeiras xornadas unha semana marcada pola inestabilidade e os contrastes atmosféricos. Tras uns días nos que as temperaturas comezaron a ascender de forma xeralizada en toda a península, a comunidade galega situarase no epicentro dun choque de masas de aire de distinta natureza. Esta situación meteorolóxica interromperá temporalmente o ambiente estival que se comezaba a respirar, devolvendo ao noroeste peninsular un escenario máis propio da primavera.
O arranque da semana estará condicionado pola chegada dunha masa de aire de orixe polar marítimo, que irrumpirá con forza polo norte peninsular a partir do martes. Este aire, de carácter fresco e húmido, provocará un aumento significativo da nubosidade en todo o territorio galego. Ademais, favorecerá a aparición de precipitacións que afectarán principalmente á metade norte da comunidade. Dende Meteored informan que en zonas elevadas do norte peninsular varias vagadas (linguas de aire frío en altura) deixarán treboadas intensas.
Un inicio de semana fresco
A consecuencia máis directa desta entrada de aire polar será un notable descenso térmico entre o martes e o xoves. Mentres que o sur do país rexistrará valores que rozarán os 40 graos, o termómetro galego experimentará unha pausa nesta subida. Nestas xornadas, espérase que as temperaturas máximas atopen serias dificultades para superar a barreira dos 25 graos nas zonas máis expostas ao vento do norte.
Esta tregua térmica virá acompañada dun reforzo dos ventos de compoñente norte e noroeste, o que incrementará de forma notable a sensación de frescor en toda a comunidade. Dende Meteored lembran que este fenómeno encaixa nas tendencias de <cambio meteorolóxicas habituais: “A atmosfera de cara ao comezo da semana recordaranos que aínda estamos nesa época de transición previa ao periodo cálido e seco do verán”. Se ben é certo que o verán climatolóxico comezou o pasado 1 de xuño, a rede de meteoroloxía explica que a presenza de aire de orixe polar no norte non é estraña nesta época.
A chegada do ‘40 de maio’
O refraneiro popular recolle que ‘ata o 40 de maio, non quites o saio’. Esa data está a caer e, con ela, chegan as temperaturas máis propias do periodo estival. A partir do mércores as choivas irán remitindo de forma progresiva, dando paso a unha estabilización do tempo de cara á xornada do xoves. Co fortalecemento das altas presións no norte da península, os ceos galegos irán despexando e o sol gañará protagonismo, permitindo que as horas de insolación propias da proximidade do solsticio de verán comecen a recuperar o terreo perdido.
Con isto, os termómetros iniciarán un ascenso gradual a partir da segunda metade da semana. As temperaturas diurnas irán recuperando valores máis estivais e agárdase que as máximas se sitúen por enriba dos 25 graos en amplas zonas da comunidade, chegando mesmo aos 31 graos o xoves en Ourense.
Unha DINA na fin de semana
Non obstante, a tranquilidade meteorolóxica do tramo final da semana podería verse truncada de cara ao venres e a fin de semana. Algúns modelos de predición apuntan que, cun chorro polar máis ondulado, a formación dunha vagada no Atlántico podería chegar a desgallarse da circulación xeral do oeste, dando lugar á formación dunha DINA (Depresión Illada en Niveis Altos) nas inmediacións peninsulares.
Se finalmente se cumpre este prognostico, a inestabilidade volverá repuntar con forza a partir do sábado en todo o cuadrante noroeste. A presenza desta DINA podería impulsar a chegada de aire máis cálido combinado con po en suspensión, favorecendo o crecemento de nubes de evolución e o desenvolvemento de tormentas extensas e localmente intensas durante as tardes, o que pecharía unha semana de constantes cambios meteorolóxicos en Galicia.
