A longa espera está a piques de rematar: quedan só un día e menos de dez horas para poder observar a eclipse total de Sol dende Galicia. Aínda que o tempo augura a chegada de nubes baixas —as máis perigosas para a visualización do fenómeno, xa que son moi densas—, a poboación continúa a buscar cal é o mellor sitio para velo. Pero, e se é o teu concello? Un novo simulador en liña, accesible a través do teléfono móbil, permite coñecer como se vai ver a eclipse dende calquera localización empregando a cámara, o acelerómetro, a brúxula e o GPS do dispositivo.
Grazas a esas ferramentas, a aplicación “Miradoiro da eclipse” calcula cara a onde mirar e cando mirar dende a túa posición, e emprega a cámara para comprobar se o horizonte real está despexado.
Ademais, é posible facer unha simulación en calquer outro sitio sen moverte: débese elixir un punto no mapa e a aplicación debuxa a eclipse sobre a imaxe real desa rúa en Google Street View, coa hora, a altura do Sol e o percorrido completo da Lúa sobre o astro. Desta forma, serve para realizar un dos consellos máis importantes para o 12 de agosto: planificar días antes.
Como funciona?
Dentro da páxina web, preséntanse tres apartados, ademais da función principal da aplicación: “Galería”, para poder compartir unha fotografía de como cada usuario vai ver a eclipse; “O tempo”, que leva á páxina web da Aemet, onde se está a realizar un seguimento diario da predición meteorolóxica; e “Tráfico”, que dirixe ao usuario ao mapa interactivo da Dirección Xeral de Tráfico (DGT).
Con todo, destacan dúas opcións principais: simular unha eclipse na túa localización ou simular noutro lugar. Na primeira, a aplicación solicita acceso á situación do móbil e ofrece todos os detalles principais sobre como será o fenómeno: totalidade ou parcialidade; hora de inicio, fin e máximo do evento; e magnitude, ademais dun mapa que ilustra a banda de totalidade. A continuación, pódese abrir a cámara e, tras calibrar o teléfono apuntando ao horizonte, sen ladealo e xirando despacio, a aplicación mide o campo de visión real. Cando remata, aparece unha ilustración animada sobre como será o traxecto da Lúa e como cubrirá por completo o Sol sobre o ceo da imaxe da cámara, a fin de simular o que ocorrerá o 12 de agosto.
Podes acceder ao simulador da eclipse total de Sol do 12 de agosto na seguinte ligazón.
