Toda España engorda tras os excesos gastronómicos do Nadal, menos os veciños de Ourense, que perden quilos. Ou polo menos iso é o que casualmente defende o grupo NC Salud, unha marca de produtos dietéticos: os ourensans son os únicos españois que non gañan peso logo da inxesta de polvoróns.
O resto dos galegos si que non se libra da delación da báscula en xaneiro, mes dos bos propósitos por excelencia, entre os que non faltan o de ir ao ximnasio ou dar coa a dieta coa que baixar peso. Na nosa comunidade, tendo en conta a excepción ourensana, gañamos entre medio e dous quilos de peso nestas datas. No caso das mulleres a media sube 1,5 quilos. Por provincias, Pontevedra é a que máis engorda, até 3,5 quilos de media.
NC Salud, firma dedicada ao asesoramento nutricional nas farmacias, recolleu datos nos últimos cinco anos. Aseguraran dispor para o seu estudo de 200.000 datos de clientes en toda España. Ourense ocupa o posto máis alto do ranking, o dos raros que acaban o Nadal máis fracos do que o comezaron, segundo o sorprendente estudo. Até medio quilo foron capaces de perder os ourensáns mentres o resto do país se queixa de que non lle entra o pantalón.
O estudo sinala que o que nos fai engordar nestas datas son os cambios nos hábitos alimenticios, o consumo máis elevado de alcohol e os compromisos de comidas ás que non podemos dicir que non.