Hai case un ano, a mediados de outubro de 2017, Galicia sufría unha das peores vagas de incendios que se recordan. En apenas dous días, decenas de miles de hectáreas arderon cun lume impulsado polos ventos de Ophelia. Unha situación que desbordou todas as previsións, e que cómpre analizar polo miúdo para evitar que se repita. Este venres, en Santiago de Compostela, unha das persoas que máis a fondo estudou este problema, Juan Picos, falará sobre o tema na edición de setembro do ciclo “Escépticos no pub“, que organiza o Círculo Escéptico en Santiago de Compostela.
Juan Picos Martín (1971) é enxeñeiro de montes pola Universidade Politécnica de Madrid (1996) e doutor pola Universidade de Vigo (2004). Actualmente é director da Escola de Enxeñaría Forestal de Pontevedra, profesor do departamento de Enxeñaría dos Recursos Naturais e Medio Ambiente da Universidade de Vigo, decano Autonómico do Colexio de Enxeñeiros de Montes ou Membro da Xunta Directiva da Sociedade Española de Ciencias Forestais. É un dos expertos máis consultados no asunto dos incendios forestais, e participou na comisión sobre os incendios que se celebrou nos meses pasados no Parlamento de Galicia.
A charla, que levará por título “Dous días de outubro. Que aprendemos sobre incendios forestais en 2017”, terá lugar ás 21 horas no café Airas Nunes (Rúa do Vilar, 17).
