Esta ilusión óptica é unha das que máis sorprenden entre todas as que enganan ao noso cerebro. Porque os puntos desta imaxe semellan moverse, pero non é así. Para resumir: esta imaxe non é un GIF, senón un deseño estático.
O movemento ilusorio é a aparencia de movemento nunha imaxe estática. Aquí, os puntos parecen cambalearse. E todo isto ten unha explicación científica. Un estudo dirixido por investigadores do Instituto Neurolóxico Barrow explicou que os pequenos movementos oculares e o parpadeo fan que os puntos se vexan coma se se movesen
O mesmo sucede con esta ilusión chamada “Serpes xiratorias“, que foi inventada por Akiyoshi Kitaoka en 2003. Este tipo específico de movemento ilusorio denomínase deriva periférica , mentres que a parte que enfocas semella estática, todas as “serpes” na túa visión periférica parecen virar.
A análise científica deste deseño foi portada no 2012 da revista Journal of Neuroscience, nun traballo realizado pola galega Susana Martínez-Conde, da Universidade do Estado de Nova York. E firma o estudo xunto a Jorge Otero-Millan e Stephen Macknik.
O estudo, dirixido polo laboratorio de Martínez-Conde, explora as bases neuronais do movemento ilusorio na rechamante ilusión visual de Akiyoshi Kitaoka. Kitaoka é un profesor de psicoloxía xaponés que se especializa en ilusións visuais de formas xeométricas e ilusións de movemento. O estudo mostra que os pequenos movementos oculares e o parpadeo poden facer que un debuxo xeométrico de “serpes” pareza bailar.
“As ilusións visuais demostran as formas en que o cerebro crea unha representación mental que difire do mundo físico”, explicou Martínez-Conde. “Ao estudar as ilusións, podemos aprender os mecanismos mediante os cales o cerebro constrúe a nosa experiencia consciente do mundo”.
Ao rastrexar os movementos oculares en oito voluntarios, os neurocientíficos atoparon unha explicación diferente: movementos oculares rápidos chamados “movementos sacádicos“, algúns dos cales son microscópicos e indetectables polo espectador, conducen ao movemento ilusorio.
A trascendencia destes estudos vai moito máis lonxe da mera curiosidade. E podería ter aplicacións médicas. Así o explica Martínez-Conde: “Os achados do noso estudo poden axudarnos a comprender as bases neuronais da percepción do movemento, tanto no cerebro normal como en pacientes con lesións cerebrais que afectan a percepción do movemento. Esta investigación podería axudar no deseño de próteses neuronais para pacientes con dano cerebral “.
Aquí podes ler o artigo
de Martínez-Conde sobre a Ilusión das Serpes