A ilusión óptica evidencia a cegueira á curvatura. Imaxe: Kohske Takahashi.
A ilusión óptica evidencia a cegueira á curvatura. Imaxe: Kohske Takahashi.

Esta ilusión óptica revela se tes cegueira á curvatura

Que ves na imaxe? Todas as liñas onduladas son iguais? Ou algunhas esquinas son máis pronunciadas ca outras en función da área?

Moita xente sente fascinación polas ilusións ópticas. Se as formas e as cores se configuran dunha determinada maneira, o noso cerebro, a través da vista, procesa a información de xeito que unha imaxe fixa se poida mover, ou completando os ocos que falta dunha forma pasmosa. Estes trucos de percepción fan moitas veces que nos cuestionemos como é o mundo que nos arrodea. E ás veces poden servir tamén para detectar como determinadas persoas perciben a contorna a través da vista. É o que acontece cunha ilusión óptica descuberta polo psicólogo xapónes Kohske Takahashi, da Universidade de Chukyo, coa que se amosa a coñecida como cegueira á curvatura:

178 curvature blindness illusion 1

A cegueira á curvatura

Na imaxe que se ve sobre estas liñas aparece unha sucesión de ondulacións que combinan as cores branca, negra e gris. Que tipo de liñas ves? Son zigzags con aparencia rectilíniea, ou máis ben ondas suaves e curvadas? Podes distinguir dous tipos de ondulacións?

O que pretende esta ilusión óptica é constatar a cegueira á curvatura, unha característica que teñen determinadas persoas, pero que non supón unha patoloxía visual. A maioría das persoas poden distinguir na franxa de fondo gris como a aparencia das ondulacións altérnase entre unha fila máis curva e outra máis rectilínea.

Agora toca mirar ás áreas de arriba á esquerda (fondo branco) e abaixo á dereita (fondo negro). Notas algo distinto? Se as liñas nestas dúas áreas parecen ter a mesma ondulación, pero ao tempo se percibe unha maior aparencia rectilínea na franxa gris, isto evidencia a cegueira á curvatura.

Por que pasa isto?

Segundo o autor da ilusión óptica, esta cegueira á curvatura podería ter relación coa forma na que percibimos as curvas e as esquinas no mundo real, provocando así a confusión no sistema visual do cerebro. “Esta ilusión implica que, para percibir unha curva suave, é preciso satisfacer máis condicións ca percibir unha esquina obtusa”, expón o Takahashi nun artigo en IPerception. “É salientable que as persoas ‘ven’ unha liña ilusoria en zigzag fronte a unha liña ondulada, en lugar de ter unha percepción deficiente”, explica. Diante disto, proponse que “os mecanismos subxacentes para a a percepción da curva suave e os da percepción das esquinas obtusas están competindo entre si dunha maneira desequilibrada, polo que as percepcións da esquina poden ser dominantes no sistema visual”.

En declaracións a The Telegraph, que recolle Science Alert, o psicólogo autor desta ilusión óptica apunta á posibilidade de que os ollos e o cerebro adaptáronse evolutivamente para detectar esquinas de forma máis eficiente que as curvas”. Deste xeito, na área con fondo gris nas que a cor cambia no cumio ou no val das ondas, o cerebro indícanos que hai unha esquina que non se percibe no resto da imaxe.


Referencia: Curvature Blindness Illusion (Publicado en IPerception).

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.