Xoves 28 Marzo 2024

O mellor banco do mundo

“A cultura tecnolóxica está a obrigar ao home a vivir en cárceres confortables, en inmensos labirintos sen horizontes, feitos de cemento, ferro e cristal”
Félix Rodríguez de la Fuente

Hoxe en día, case todos cargamos cun móbil con cámara e acceso a internet. Así, as redes sociais, Instagram, WhatsApp,… fanse de ouro xa que a xente comparte fotos de viaxes, lugares, comidas, basicamente a súa vida. Entre tanta variedade e posibilidades do mundo online púxose de moda o dos mellores e máis bonitos bancos do mundo.

Publicidade

Estas imaxes pódense volver virales como lle aconteceu a unha foto tomada por Dani Caxete en 2014 ás 3 da madrugada nun banco situado nos cantís de Loiba (Ortigueira). No banco pódese ler: “The best Bank of the World” (O mellor banco do mundo). Os cantís de Loiba e as súas covas ou furnas son espectaculares. Entre tanta beleza non podían faltar as praias como a de O Picón e O Coitelo. Cando o mar bravío choca contra as rochas, unha delas, a Pena Furada, produce unha sonoridade especial. Por desgraza, aínda non fun pero din que vaias de día ou de noite sentar no banco de Loiba é unha experiencia única pola beleza das vistas e a tranquilidade que un percibe estando alí sentado (http://www.espasanteortegal.es/105117100). Como dicía Upton Sinclair, “As terras pertencen aos seus donos, pero a paisaxe é de quen sabe aprecialo”.

En Redondela que está na ría de Vigo non quedaron atrás e reclamaron o seu trono para o mellor banco do mundo. O banco está situado no miradoiro do “Campo da Rata” no Monte de Cedeira. No banco pódese ler: “Galicia. It´s different” (Galicia. É diferente). Desde aí ves gran parte da ría de Vigo incluídas as illas Cíes, a ponte de Rande ou a enseada de San Simón. As vistas son panorámicas e pagan moito a pena. Outra fotaza!!!

Pero como en todo pódese ir máis lonxe e a un grupo de veciños de Noalla (Sanxenxo) acendéuselles a lámpada e o enxeño levoulles a facer tamén os seus propios bancos que pesan un 200Kg, transportalos e colocalos onde eles consideraron oportuno, e onde as vistas son das que che deixan coa boca aberta.

Banco de Noalla. Foto: Rosa Lores, vía Twitter.
Banco de Noalla. Foto: Rosa Lores, vía Twitter.

Un colocárono en Punta Faxilda e outro na Lanzada. Á falta dun puxéronse dous, Olé!!! Simplemente les “NOALLA”, dabondo para saír na TVE nacional pola súa beleza e polo seu misticismo. Ata os de Google Maps incorporaron ao seu mapa o banco que hai no illote situado entre a Praia dá Area Gorda e a Praia dá Lapa como “Banco PANORÁMICO da Lanzada”.).

Así, a terra de Cornelia bautizada a diario polo mar atlántico é visitada polos fans da fotografía, por aqueles que buscan coñecer un sitio novo ou distinto, e moitas veces, por ver algo pululando na internet tan simple como unha fotografía. Por tanto, agora Noalla tamén ten un dos mellores bancos do mundo. Ambos os lugares son espectaculares e cunhas panorámicas de quitar o hipo.

Honestamente paréceme unha gran iniciativa, a condición de que se protexan esas paraxes marabillosas e non se acaben esnaquizando polo turismo, etc. Como diría Gary Snyder “A natureza non é un lugar para visitar. É o fogar!” A día de hoxe xa hai moitos máis bancos como os mencionados e seguro isto seguirá medrando.

Ao final, o bonito de todo isto é que lugares que pasaban quizais desapercibidos agora son máis coñecidos e podemos gozalos todos. Da noite para a mañá convertéronse nun atractivo turístico senón o eran. Nace un novo xeito de fomentar o sendeirismo e vida saudable, un reclamo para o gozar e para marabillarnos coa beleza da nosa terra, unha maneira de baixar a tensión da vida diaria e recobrar a enerxía, unha forma sinxela e barata de dar e coñecer nosa Galicia, aquí e alén das fronteiras.

Que pensaría o gran naturalista, divulgador e defensor do medio ambiente Félix Rodríguez de la Fuente sobre estes bancos, as súas vistas e as paraxes en que se enclavan? Sexa o que sexa está claro que se non fose pola iniciativa de veciños/as destes lugares, eses bancos de madeira e esas fotos virales na internet, quizais moita xente nunca coñecería nin podería gozar de Loiba, do Monte daRata nin de Noalla. Agora pregúntome… Cal será o seguinte lugar que reclame o trono ao mellor banco do mundo?

Aproveito para lembrar que nunca debemos esquecer que ?”A natureza é inagotablemente sustentable se coidamos dela. É a nosa responsabilidade universal pasar unha terra sa ás futuras xeracións” (Sylvia Dolson) e que “Na natureza está a preservación do mundo” (Henry David Thoreau). Como se adoita dicir, unha cousa é dicilo e outra facelo realidade. Esperemos que non sexa demasiado tarde.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un mapa da NASA alerta da subida do mar en Galicia e revela as zonas máis afectadas

Unha ferramenta dixital baseada nos datos científicos do Sexto Informe do IPCC ofrece unha proxección sobre as subidas do nivel do mar en todo o mundo ata 2150

A gran eclipse solar de abril: cando e onde vela en Galicia?

Este fenómeno astronómico será visible de maneira parcial no oeste da comunidade, especialmente na franxa atlántica da Coruña e Pontevedra

O mapa dos ‘químicos eternos’ en Galicia: ata 70 zonas sospeitosas de grave contaminación

Unha investigación europea sinala a presenza no continente destas substancias nocivas para o medioambiente e a saúde

Identificado un novo campamento romano na fronteira entre Galicia e Portugal

Un equipo de arqueólogos detecta un posible recinto fortificado de tres hectáreas de extensión datado entre os séculos I a.C. e I d.C.