A neve cubre as montañas de Lugo tras do paso esta semana das borrascas Gabriel e Helena. As folerpas caeron tamén en outros puntos altos da comunidade, como na área do Deza. Mesmo na cidade de Lugo producíronse precipitacións en forma de neve en momentos puntuais da xornada do venres 1 de febreiro.
Tras do paso das dúas borrascas, o anticiclón regresa a Galicia, segundo as previsións da Axencia Estatal de Meteoroloxía e de Meteogalicia. Tamén desaparecen os avisos, que chegaron a alcanzar o nivel vermello na costa ao longo do pasado venres.
Neste vídeo divulgado polo Hotel Piornedo, nos Ancares, podemos ver o estado da estrada entre Campa da Braña e a aldea do Piornedo, totalmente cuberta de neve.
E así foi o mapa das precipitacións de neve ofrecido por Meteogalicia, onde se observa a intensidade das nevaradas na montaña lucense.