O vehículo creado por universitarios galegos competirá en Assen, Silverstone e Montmeló

O monopraza de UVigo Motorsport ten un chasis máis lixeiro e unha aerodinámica máis eficiente que os modelos de anos anteriores

O curso está a piques de rematar, e un grupo de 85 alumnos e alumnas, dunha vintena de titulacións dos tres campus da UVigo, clausura o ano académico cun coche deseñado e construído por eles mesmos. Son integrantes da única escudaría galega da Formula Student, UVigo Motorsport, e materializaron o UM24, o vehículo monopraza con múltiples innovacións que competirá nos circuítos de Assen (Holanda), Silverstone (Reino Unido) e Montmeló (España) entre xullo e agosto.

O traballo de 10 meses deste grupo de estudantes deuse a coñecer nun acto celebrado esta semana no salón de actos da Escola de Enxeñaría Industrial, no que o vehículo se amosou publicamente por vez primeira e no que se coñeceron todos os detalles do proceso do seu deseño e construción. Presentaron as novidades que introduce respecto do seu antecesor, con tempo para repasar a historia da escudaría desde o ano 2014 ata a actualidade. 

Publicidade

O presidente e Team Leader de UVigo Motorsport, Denis Pallarés, foi o encargado de exercer de condutor do acto, no que tanto el como o resto de integrantes do equipo manifestaron o seu orgullo de formar parte desta iniciativa, agradeceron o apoio dos patrocinadores e manifestaron as súas expectativas de mellorar os resultados acadados o ano pasado, ademais de detallar polo miúdo todas as melloras introducidas no vehículo ao longo dos meses. 

Un vehículo cheo de innovacións

O UM24 é o sucesor dunha saga de vehículos que arrancaron co UM15 hai unha década. Respecto do seu antecesor, o UM23, incorpora importantes novidades: “Reduciuse o peso do chasis, mellorando o rendemento do vehículo. A aerodinámica optimizouse, facéndoa máis eficiente”. Con todo, non son estes os últimos cambios: o motor agora conta un novo sistema de refrixeración e un mapa actualizado que duplica a potencia a baixas porcentaxes do acelerador e mellora a eficiencia a altas porcentaxes.

Publicidade

“A dinámica dianteira do vehículo optimizouse para unha maior estabilidade e control. E ademais, implementouse un acelerador electrónico (ETC) e engadíronse máis sensores, mellorando así a cantidade de información que temos do vehículo para o seu posterior procesamento á hora de realizar set-ups”, detalla o equipo de UVigo Motorsport. Aínda que a día de hoxe o vehículo é completamente funcional e está listo para correr, o grupo aproveitará as semanas que restan ata a primeira proba para seguir traballando na optimización de todos os sistema para chegar co coche no mellor estado posible ás competicións.

Logo dun curso enteiro traballando no deseño e construción do UM24, os integrantes do equipo teñen claro que “é algo ao que se lle dedica moito tempo e esforzo, pero que, cando miras que todo se materializou nalgo que ruxe e corre, paga a pena”, explican os membros da escudaría, que agradecen a implicación en todo o proceso dos máis de 70 patrocinadores cos que contaron esta tempada. 

Primeira competición en Assen

O circuito de Assen será o primeiro destino do UM24, que correrá en Holanda entre o 13 e o 18 de xullo. Seguiralle Silverstone, onde debutará o equipo autónomo do 17 ao 21 de xullo, e as probas desta tempada rematarán en Montmeló, do 1 ao 8 de agosto. “Este ano o coche de combustión competirá en Assen e Montmeló, mentres que o coche autónomo o fará en Silverstone, onde a organización nos deixa a todos os equipos o mesmo modelo de coche preparado de condución autónoma”, explican, creándose así un sistema de igualdade no que só se avalía o software desenvolvido polo departamento de autónomo co doutros equipos.

O equipo chega ás competicións coa expectativa de mellorar os resultados da anterior tempada, 10º posto en Silverstone e o 6º en Montmeló, a mellor ata o momento, en especial nas probas estáticas. “Temos especial confianza no Cost & Manufacturing, unha das tres probas estáticas ás que nos enfrontamos na que debemos de demostrar a profundidade dos nosos coñecementos sobre os procesos de fabricación e os seus custos derivados”, explican.

“Este ano designamos unha persoa encargada desta proba en calidade de responsable, xunto a un pequeno equipo e tras entregar toda a documentación, podemos afirmar que temos o mellor Cost & Manufacturing da historia do equipo polo que confiamos plenamente en que teremos un bo resultado nesta proba”, sinalan os membros do equipo. 


Podes ler a noticia completa do DUVI na seguinte ligazón.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A UVigo emprega plantas trampa para loitar contra unha praga nas patacas

A 'Solanum sisymbriifolium' é capaz de enganar ao nematodo que ataca ao tubérculo causando a súa morte

Un equipo de atlanTTic deseña antenas innovadoras para satélites xeoestacionarios

O proxecto da UVigo busca unha redución na masa e o volume da tecnoloxía, así como diminuír os custos

Un equipo da UVigo analiza en alta resolución o transporte de humidade no Atlántico norte

O grupo EphysLab investiga como se altera o ciclo hidrolóxico na rexión oceánica por procesos relacionados co cambio climático

As cinzas dos lumes de 2017 poden causar alteracións no plancto costeiro da Vigo

O estudo realizado por investigadores do CIM da Universidade de Vigo centra a súa investigación na escorredura posterior ás queimas