O investigador Jordi Borràs foi galardoado co Premio atlanTTic á mellor tese de doutoramento no ámbito das tecnoloxías de telecomunicación. Recibiuno polo seu traballo na Universitat Politècnica de Catalunya, na que aborda un desafío central nas comunicacións sen fíos: a mitigación de interferencias.
“O principal obxectivo da miña tese doutoral era (…) evitar interferencias sen a necesidade de coñecer perfectamente o estado da rede de comunicacións e de que o transmisor e o receptor estean cooperando”, explica o investigador premiado. Ademais, o experto resalta as dificultades dun traballo tan teórico, que obriga a buscar aplicacións relevantes e comunicar os seus achados de forma clara e rigorosa.
A tese de Borràs, desenvolvida na Universitat Politècnica de Catalunya (UPC), consegue propoñer un esquema innovador de transmisión para sistemas mono e multi-antena. Ademais, permite reducir ou mesmo evitar estas interferencias, avanzando cara a sistemas de comunicación máis robustos e eficientes.
Un dos aspectos máis destacados da tese gañadora é a súa potencial aplicación práctica na coexistencia de tecnoloxías de comunicación heteroxéneas, como as redes móbiles 4G e 5G ou transmisións con e sen restricións de latencia. Isto supón un avance de cara a mellorar a eficiencia espectral en contextos cada vez máis densos e complexos. Ademais, podería mitigar a interferencia pola coexistencia entre distintas tecnoloxías.
Novos premios convocados
O reitor da Universidade de Vigo afirmou que a consolidación deste premio é “unha mostra do compromiso do centro atlanTTic e da UVigo coa investigación de excelencia e co apoio ao talento novo”. O centro acaba de convocar a terceira edición do Premio atlanTTic á mellor tese en tecnoloxías de telecomunicación, en colaboración coa sección española do Instituto de Enxeñeiros Eléctricos e Electrónicos (IEEE).
Poderán concorrer as persoas que posúan un título de doutoramento, de calquera nacionalidade, que defendesen a súa tese no eido das tecnoloxías de telecomunicación (comunicacións, servizos dixitais e/ou ciberseguridade). Iso si, coa máxima cualificación (excelente cum laude). As bases da convocatoria están dispoñibles nesta ligazón e o prazo de candidaturas permanecerá aberto ata o 16 de setembro de 2025.
Investigador Cum Laude
Nado en Cataluña, Jordi Borràs obtivo o Grao en Ciencias e Tecnoloxías de Telecomunicación (2016), o Máster en Enxeñaría de Telecomunicación (especialidade en Comunicacións Sen Fíos, 2018) e o Doutoramento en Teoría da Sinal e Comunicacións (con sobresaliente cum laude). Todo pola Universitat Politècnica de Catalunya (UPC), onde xa destacara como investigador no grupo SPCOM.
Dende maio de 2023 é investigador posdoutoral en atlanTTic, colaborando co equipo de Procesado do Sinal en Comunicacións (GPSC). Neste, participou en proxectos sobre comunicacións full-duplex, o novo paradigma ISAC (Integrated Sensing and Communications) e vulnerabilidades en aprendizaxe federada. Este mesmo mes rematará a súa etapa en Galicia e incorporarase como profesor axudante doutor á Universitat Politècnica de Catalunya, onde continuará desenvolvendo a súa carreira investigadora.
Podes ler o artigo do DUVI aquí.
