Xoves 18 Xullo 2024

Un traballo da USC, mellor artigo de xeografía en revistas estranxeiras

O investigador Horacio García é o primeiro asinante da publicación, recoñecida co VIII Premio "Roser Majoral Moliné" da Asociación Española de Xeografía

A xeomorfoloxía aplicada e o seu papel para mellorar a ecoloxía fluvial e o deseño da políticas de restauración conforma o eixo sobre o que se asenta o traballo titulado Promoting fluvial geomorphology to “live with rivers” in the Anthropocene Era, cuxo primeiro asinante é o investigador da Universidade de Santiago de Compostela (USC) Horacio García. O traballo acaba de recibir o VIII Premio Roser Majoral Moliné ao mellor artigo de xeografía publicado en revistas científicas estranxeiras na súa edición de 2022. O xurado destacou “a orixinalidade no enfoque do traballo, o que probablemente o converterá nun artigo de referencia” no seu ámbito, tanto dende o punto de vista teórico e de reflexión sobre a disciplina, como para as administracións e profesionais competentes na xestión fluvial. O galardón é outorgado pola Asociación Española de Xeografía.

A xeomorfoloxía fluvial é a ciencia encargada dos procesos e formas presentes nun río: o caudal líquido —auga— e o caudal sólido —sedimentos, areas, gravas, cantos e madeira—. A función básica dun río consiste, precisamente, nese transporte de caudais das terras do interior cara ao mar, viaxe sobre a cal se artella a súa biodiversidade. O estudo desenvolvido polo investigador da Facultade de Xeografía e Historia céntrase no momento actual de cambio global dentro do evento xeolóxico denominado Antropoceno. A investigación conta con achegas de especialistas da USC e das Universidades de Zaragoza e do País Vasco, xunto con persoal investigador de Francia e Nova Zelandia.

Publicidade

24 entrevistas

O traballo contén máis dunha vintena de entrevistas a especialistas do eido da bioloxía, ecoloxía, xeografía, enxeñaría, xestión fluvial e planificación de diferentes países. “A pesar da importancia da xeomorfoloxía na comprensión da dinámica e funcionamento dun río, o artigo amosa que aínda queda un amplo camiño por percorrer, a pesar de que a Directiva Marco da Auga (200/60/CE) xa pon de manifesto tal importancia”, explica Horacio García. “Na nosa investigación detectamos tres barreiras —académicas, de xestión e sociais— que impiden que a xeomorfoloxía se implique máis na xestión dos nosos ríos”, engade.

En concreto, propuxéronse tres principios para convivir cos ríos, considerando a xeomorfoloxía como un dos factores clave no contexto de cambio global: traballar a través das fronteiras disciplinares, promover enfoques integrados e mellorar a educación fluvial. “As nosas conclusións consideran os ríos como sistemas naturais e dinámicos onde o coñecemento xeomorfolóxico pode axudar a mellorar a visión de ‘canle’ que se ten dos ríos e adoptar un enfoque transdisciplinar onde se deseñen obxectivos de xestión máis holísticos”, continúa o investigador da USC.

Publicidade

Un dos puntos máis salientables é o papel das enchentes dos ríos, “verdadeiro motor da súa dinámica e unha necesidade vital para preservar a ecoloxía dos sistemas fluviais”, matiza Horacio García. Con todo, o investigador subliña que as ametencias son tamén “un factor de risco que como sociedade fomentamos durante séculos e máis intensamente nas últimas décadas” ao ocupar o espazo do río e tratar de domesticar as súas canles. Alfredo Ollero, Askoa Ibisate, Ian C. Fuller, Russell G. Death e Hervé Piégay completan a listaxe de asinantes do artigo.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Este cranio de quen é? Como identificar restos humanos con imaxes de antes e despois da morte

Un investigador do CITIC desenvolve un sistema que axudará a mellorar a metodoloxía da superposición craniofacial

Todo caduca: o investigador que recrea obras de arte para estudar como envellecen

Un experto en ciencia de materiais colabora co CGAC para avaliar a calidade e durabilidade dos materiais que se empregan no patrimonio artístico do centro galego

Unha tese da USC propón o uso de bagazo de Albariño para o penso e microalgas para facer filloas

O investigador Aly Jesús Castillo estuda o emprego de novos alimentos ou materias primas para dar resposta ás actuais demandas do sector agroalimentario

Unha física galega acada un dos cargos máis relevantes nun experimento no CERN

María Vieites será coordinadora adxunta do detector de partículas LHCb