A rede Euraxess da Comisión Europea acaba de concederlle á Universidade da Coruña o selo de excelencia investigadora HR Excellence. Este premio identifica ás institucións e organizacións que apoian un ambiente de traballo favorable e estimulante para os investigadores, e culmina o recoñecemento da excelencia dos recursos humanos na investigación da Comisión Europea.
Para conseguir este selo, hai que acreditar boas prácticas na contratación de investigadores nun modelo aberto e transparente baseado no mérito. O vicerreitor de Política Científica da UDC, Salvador Naya, sinalou que a obtención deste selo é “unha excelente noticia para as universidades, xa que hai proxectos europeos para os que é preciso ter este selo”. Naya tamén explicou que a UDC incluirá xa os criterios do selo na vindeira convocatoria do programa InTalent-UDC-Inditex, para contratar investigadores posdoutorais con proxección e ampla traxectoria internacional, e prevista para finais deste mesmo mes.
A Universidade de Santiago de Compostela conta co selo HR desde febreiro de 2017, mentres que a UVigo xa solicitou a súa inclusión a finais de 2016 e está á espera do recoñecemento.
