O concello lugués de Quiroga, no corazón da serra do Courel, quere ter unha das pontes colgantes máis longas do mundo para revitalizar a súa oferta turística. A proposta, deseñada por enxeñeiros da Universidade da Coruña, non é apta para persoas que padezan de vertixe: 648 metros de pasarela suspendida a 186 metros sobre o val do río Ferreiriño.
A ponte de Campodola parte da iniciativa de entidades locales en colaboración co goberno local de Quiroga, que xa tería comezado os primeiros movementos para acadar a financiación necesaria para a súa construcción co ano 2028 no horizonte.
Todo para que o Courel sexa unha parada máis para aqueles que queren ver a natureza a vista de aguia, unha lista na que destacan as espectaculares pontes colgantes de Dolní Morava (Chequia) ou Canilo (Andorra), e á que se sumará proximamente a de Peñarrubia (Cantabria), nos Picos de Europa.
O encargo recaeu no Centro de Innovación Tecnolóxica en Edificación e Enxeñería Civil (CITEEC) da Universidade da Coruña, composto por Aitor Baldomir, Arturo Fontán e Santiago Hernández, entre outros. Deles parte a idea dunha pasarela de case 650 metros a 186 metros do chan, sostida cunhas catenarias de 828 metros de lonxitude, o récord do mundo neste tipo de estruturas.
Accesible para todos
O diámetro dos cables sería inferior aos 10 centímetros para un peso total da ponte de 170 toneladas, repartidas en 162 módulos de catro metros cada un que se sosteñen por medio de dous planos de péndolas. Para mellorar a súa estabilidade e rixidez, os enxeñeiros deseñaron un sistema de cables inferiores.
A de Campadola diferénciase do resto en que carecería de torres de apoio, o que permite que sexa “case inapreciable na distancia” á vista, favorecendo a súa integración na paisaxe. Tamén resaltan a suavidade da pendente de inclinación da pasarela. Moveríase entre o 1% e o 3% de máxima, o que a faría accesible para todo tipo de público.
Unha trapallada máis para atraer panarras ao monte que non ten máis vida ca saír nas stories do Instagram…