O Instituto de Investigación de Santiago de Compostela (IDIS) acaba de recibir a Axuda á Investigación en Saúde da Fundación Mutua Madrileña para liderar un estudo na área de traumatoloxía. O proxecto entra dentro dos 26 estudos e ensaios clínicos dirixidos á mellora dos tratamentos médicos que se desenvolverán en diferentes centros de investigación de toda España grazas a esta axuda.
O estudo estará dirixido polo doutor Francisco Campos, do Grupo de Ictus Traslacional do IDIS e do Hospital Clínico Universitario de Santiago (CHUS) que analizará a resposta da estrutura vascular cerebral tras o dano por traumatismo cranioencefálico en fase aguda e crónica, mediante técnicas de imaxe de vangarda e de alta precisión.
“A abordaxe que facemos neste proxecto busca coñecer mellor a fisiopatología desta enfermidade, principalmente analizando como se ve afectado o sistema vascular cerebral tras unha lesión, e na mesma medida, analizar a eficacia de novas terapias que poidan contribuír a reducir o dano neuronal e favorecer a recuperación”, explica o doutor.
Estudos como este teñen unha repercusión e aplicabilidade directa sobre o paciente e familiares. “Desde un punto de vista clínico, sen dúbida, axudará nun futuro para reducir a carga asistencial e o gasto sanitario”, engade o investigador.
26 axudas á investigación
Os 26 proxectos seleccionados pola Fundación Mutua Madrileña levaranse a cabo en hospitais públicos españois nas áreas de transplantes, centrada este ano na inmunotolerancia, os xenotrasplantes e a preservación de órganos, traumatoloxía e as súas secuelas, incluídas as patoloxías neurolóxicas derivadas de traumatismos, enfermidades raras que se manifestan na infancia, oncoloxía centrada en inmunoterapia e cancro e saúde mental, sobre todo enfocada nos trastornos infanto-xuvenís.
A Fundación Mutua Madrileña destinou nestes anos 68 millóns de euros a esta convocatoria anual de axudas que serviu para poñer en marcha 1.400 proxectos de investigación. A través destas axudas, a entidade contribúe economicamente coa investigación médica de calidade que se fai en España.
