Un problema de contaminación por hidrocarburos, despois dun vertido que se produciu hai anos, e que chegou a causar problemas de saúde, mantén cerrada desde hai tres anos por reformas o edificio principal da Facultade de Farmacia de Santiago de Compostela, onde se atopan numerosas aulas e parte dos laboratorios. O edificio, construído nos anos 70 na posta en marcha do Campus Vida, acolle unha das titulacións de referencia internacional da institución compostelá, pero o seu deterioro é notable. Este xoves, despois de estudar diversas opcións, o consello de Goberno da USC anunciou que se ía “proceder á demolición da parte afectada do centro”.
A noticia xa fora avanzada esta semana a alumnos e profesores polo decano, Francisco Otero, e o xerente, Xavier Ferreira, segundo recolleu La Voz de Santiago. Con todo, o equipo de goberno sinalou que se ían “esgotar todas as posibilidades de descontaminación, comezando por un método menos agresivo e custoso que os probados ata agora e cuxa viabilidade se coñecería en tres meses”.
En palabras do reitor, Antonio López, dado que o procedemento e resultado da descontaminación non está aínda claro, resultaría “arriscado e custoso” proxectar outro tipo de solución para un asunto que afecta a universidade en xeral e os colectivos de profesorado, persoal de administración e servizos e alumnado da Facultade de Farmacia en particular.
Por tanto, a USC solicitará nos vindeiros días un proxecto de demolición para o aulario da Facultade –a que coincide co frontal do centro- e así coñecer con exactitude o custo da acción. O proxecto, segundo o equipo de dirección, prevese amortizar en sete anos, tendo en conta o aforro de 250.000 euros anuais para a Universidade que supoñen 5.500 metros cadrados menos de mantemento.
Alén do plan de demolición, encargarase tamén un estudo sobre o estado dos tres edificios restantes que compoñen o conxunto da Facultade, para rehabilitalos e converter un deles (o número 1) nun espazo docente con aulas e laboratorios.
Protesta do alumnado
Coincidindo no mesmo día coa reivindicación da Asemblea de Investigadoras da USC, alumnos e persoal da Facultade de Farmacia organizaron unha protesta ás portas (clausuradas) do centro. “Non coñecemos aos nosos compañeiros”; “Facultade Morta no Campus Vida” ou “Queremos laboratorios, non cloacas” foron algunhas das mensaxes da concentración.
Despois de tres anos de peche, hai estudantes de Farmacia que apenas pisaron a Facultade na que están matriculados. As reformas obrigan a un bo número de mozas e mozos a asistir ás aulas noutros edificios do Campus, alén das malas condicións nas que están algunhas das estancias que seguen en funcionamento.
¿dos 70s? Pois cando fun a Santiago a finais dos 80s xa asemellaba vello.
Alguen coñece que é iso da¿ “contaminación por Hidrocarburos”?