A UVigo abre as portas de atlanTTic por un día para coñecer de preto o seu traballo

O Centro de Investigación da UVigo abrirá as portas este venres para dar a coñecer as súas competencias en tecnoloxías de telecomunicacións

O Centro de Investigación en Tecnoloxías de Telecomunicación, atlanTTic, da Universidade de Vigo abrirá as súas portas ao público este venres, 18 de novembro, de 16.00 a 19.00 horas, para amosar á cidadanía o seu traballo diario no eido da ciencia. O público en xeral, dende nenos ata adultos, poderá coñecer de preto as instalacións e formar parte das visitas guiadas aos laboratorios do centro de excelencia de investigación desta universidade galega.

Visita guiada ao público

Trátase dunha oportunidade na que os individuos poden porse en contacto co seu persoal investigador e coñecer a forma en que inflúen no deseño das tecnoloxías do futuro a través da súa colaboración activa en proxectos desenvolvidos para empresas e institucións tanto nacionais como internacionais. Baixo o lema “Conecta con atlanTTic”, unha vintena de investigadoras e investigadores darán resposta ás dúbidas do público.

Publicidade

Así mesmo, máis alá dos stands con demostracións, as persoas asistentes poderán coñecer tres dos laboratorios de atlanTTic nos que traballa o persoal investigador e técnico. Desta maneira, amosarán oos asistentes o laboratorio de Seguimento de satélites, o laboratorio de Fotónica (no que se abordará a revolución dos chips fotónicos) ou o de Acústica, que agocha unha cámara semianecoica, illada das fontes sonoras externas, deseñada e recuberta para absorber as ondas sonoras e electromagnéticas e cunha sala de control “non-enviroment”.  

Durante a xornada, o centro vigués ofrecerá espazos para compartir os seus proxectos máis novidosos ou mesmo os resultados das súas últimas investigacións en curso, coa fin de achegar a ciencia á cidadanía pero tamén intentando espertar vocacións entre as e os máis pequenos. Ademais, e coa fin de amenizar a cita científica, sortearase, entre os visitantes, un kit de produtos promocionais do centro.

Porén, nesta xornada amosaranse traballos como o SignaMed, para o emprego do recoñecemento automático de lingua de signos; a app talkAACtive, que axuda a persoas con Trastorno do Espectro Autista no entorno laboral; o Bot de Entretemento e Acompañamento, para persoas maiores; o proxecto rurAllure, para planificar itinerarios de rutas peregrinas europeas; Fawrensian, o software que analiza a veracidade das fotografías; Lightboard, para a educación dixital; LifeTEC, ferramentas para a loita contra os lumes; LitterDrone e BEWATS, teledetección e seguimento de lixo no mar, ou Panoramix, para a detección do deterioro cognitivo.  

Centro de investigación atlanTTic

O atlanTTic é un centro de investigación destacado que está composto por máis de 170 profesionais que desenvolven coñecemento e información no campo da privacidade e da seguridade, as tecnoloxías multimedia, as redes de datos, os e-servizos, a bioenxeñaría, o radar, as comunicacións por satélite e, en xeral, as comunicacións radio e ópticas. O seu equipo investigador lidera  proxectos H2020 e gañou diversos premios pola súa labor, así como tamén pertence a algunhas das academias e sociedades científicas e profesionais máis recoñecidas. A súa vez, asinan artigos en cabeceiras sobre ciencia como Science ou Nature

Ademais, o grupo científico traballa en programas en colaboración coa Axencia Espacial Europea (ESA), en proxectos para mellorar a ciberseguridade, en aplicacións para achegar a cultura ou o Camiño de Santiago a tódalas persoas, en ferramentas para a auto-diagnose de enfermidades, ou mesmo nos últimos avances en 5G, cuántica, Intelixencia Artificial ou fotónica integrada.

As portas abertas do encontro enmárcanse no programa de actividades de Divulgando Ciencia Singular e require inscrición previa que pode realizarse a través da propia web de atlanTTic.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A iniciativa dun profesor universitario para frear a deterioración ambiental en Galicia

Óscar Briones pon o foco nos concellos e propón blindar o territorio para evitar o impacto negativo en zonas tensionadas como as Rías Baixas

Un novo sistema galego axiliza o diagnóstico a través de imaxes de raios X

Un equipo da UVigo, en colaboración con sanitarios do Hospital de Ourense, deseña unha ferramenta baseada na intelixencia artificial

A enerxía eléctrica foi a maior fonte de gases de efecto invernadoiro en Galicia en 2022

A actividade deste sector produciu 2,2 megatoneladas de emisións no territorio galego, cun forte impacto da empresa Repsol

Un artigo da UVigo, o mellor de 2023 no eido da mecánica de rochas

A revista 'Rock Mechanics and Rock Engineering' galardoa a dous investigadores da institución galega por un estudo sobre a Pena do Equilibio, en Ponteareas