Coincidindo coa celebración este pasado 25 de setembro do Día Mundial do Farmacéutico baixo o lema Fortalecendo os sistemas sanitarios cos farmacéuticos, queremos destacar o papel fundamental que desempeñan os farmacéuticos na sociedade galega, desde o deseño e o desenvolvemento de novos medicamentos de uso humano e veterinario, a súa produción, rexistro e aprobación, distribución, a súa dispensa, e asesoramento aos pacientes ata a monitorización da súa seguridade e o seu impacto no medio ambiente.
A oficina de farmacia é moito máis que un establecemento onde se dispensan medicamentos. É un piar fundamental nas nosas comunidades facendo accesibles os medicamentos a toda a poboación e ofrecendo consello e asesoramento sanitario. Nas cidades e, sobre todo, nas vilas, a súa mera presenza serve como elemento de cohesión. Os farmacéuticos achegan os veciños á rede sanitaria e contribúen a mellorar a saúde de poboacións vulnerables. Isto é especialmente relevante en Galicia, onde á dispersión xeográfica únese un gran envellecemento da poboación.
Os profesionais farmacéuticos que desenvolven a súa actividade nas oficinas de farmacia da nosa comunidade representan a metade dos aproximadamente 10.000 farmacéuticos existentes en Galicia. A outra metade traballa en farmacias hospitalarias, análises clínicas, saúde pública, industria e distribución farmacéutica, óptica e acústica, alimentación, dermofarmacia, ortopedia, e universidades e centros de investigación. Galicia destaca pola excelencia da investigación e a innovación no ámbito do medicamento e os produtos sanitarios, cunha intensa actividade centrada en atopar respostas personalizadas ás necesidades de cada paciente.
Un traballo que apoiamos e impulsamos desde a Real Academia de Farmacia de Galicia a través da promoción da investigación, a formación continua e a difusión de coñecementos que potencian o avance da Farmacia e ciencias afíns. Con este foco a nosa institución quere servir como punto de encontro para todos os sectores da sociedade con inquedanzas na mellora da saúde das persoas, os animais e os ecosistemas.
*Ángel Concheiro é o presidente da Real Academia de Farmacia de Galicia.
