Os premios Prismas naceron en 1988 como un certame internacional de vídeo científico convocado pola Casa das Ciencias do Concello da Coruña. En 1993 incorporáronse as categorías de libros inéditos e editados, e un ano máis tarde chegaba o galardón ao mellor traballo en soporte informático. Os artigos científicos comezaron a premiarse en 1996 e as páxinas web en 2005. Hoxe en día estes premios recoñecendo a excelencia en oito categorías, dando cabida a todo tipo de formatos de divulgación científica.
Vista en perspectiva, a historia dos Prismas é tamén a do despegamento da divulgación científica no noso país. Os traballos premiados ao longo destas trinta e tres edicións reflicten o nacemento dun oficio que partindo da tradición do documental, o ensaio e o xornalismo científico acaba ramificándose e desenvolvendo linguaxes adaptadas aos medios dispoñibles en cada época.
Un dos sinais de identidade dos Prismas, e ao mesmo tempo una das razóns do seu prestixio, é a composición dos seus xurados, formados por profesionais da divulgación, o xornalismo e a investigación; docentes, activistas ou colegas doutros museos de ciencia en composicións diversas e sempre cambiantes.
Discutir sobre os méritos (e limitacións) das decenas de traballos que se presentan en cada edición pode resultar esgotador, pero sempre é unha fonte de inspiración e axúdanos a manter unha mirada fresca e aberta sobre o significado da excelencia no noso oficio. Ademais, esta fórmula garante que enfoques e estilos que escapan ao radar dun xurado poidan ser recoñecidos polo seguinte.
É por iso que os Prismas son uns premios extraordinariamente competitivos pero ao mesmo tempo abertos, en cuxo palmarés conviven profesionais de renome, novas promesas, proxectos consolidados e propostas dispostas a asumir todos os riscos. Neste momento xa traballamos perfilando a edición do ano que vén, na que se recoñecerá a mellor divulgación realizada neste extraordinario 2020. O noso desexo é que, para entón, o xurado poida outorgar polo menos un premio a quen nos contase de forma maxistral como logramos atopar a saída deste labirinto.
Estes son os gañadores dos premios Prismas Casa das Ciencias 2020
