O Día Mundial do Ril convídanos a reflexionar sobre a conexión entre a nosa saúde e a do planeta. A enfermidade renal crónica afecta unha de cada sete persoas adultas en España e moitas delas descoñecen que os seus riles están danados ata que a patoloxía se atopa xa en fases avanzadas.
Protexer os nosos riles e protexer o planeta son accións que van da man. Cando danamos o medio ambiente, aumentan os riscos de enfermidade renal; e cando a doenza progresa, medra tamén a nosa pegada ambiental. Por iso é fundamental fomentar contornas e estilos de vida que beneficien tanto as persoas como o planeta: aire limpo, cidades activas, enerxías renovables, alimentación equilibrada e traballos seguros fronte á calor contribúen a reducir a incidencia de enfermidade renal.
A prevención é, sen dúbida, o tratamento máis sostible. Manter unha correcta hidratación, controlar a presión arterial e o azucre en sangue, levar unha alimentación equilibrada, evitar o tabaco e realizar actividade física regularmente non só protexe a función renal, senón que tamén reduce o impacto ambiental asociado a tratamentos máis complexos e custosos, como a diálise. Cada hábito saudable e cada diagnóstico precoz representa un dobre beneficio: coidar as persoas e coidar o planeta.
Ademais, a innovación e a eficiencia nos tratamentos renais permiten avanzar cara a unha nefroloxía máis verde e próxima. Os sistemas sanitarios teñen o reto de avanzar cara a modelos máis sostibles. A hemodiálise, unha terapia que salva vidas, consome importantes recursos e xera residuos. Desde Fundación Renal Española traballamos para conseguir que sexa posible reducir de forma significativa o consumo de auga e enerxía e a xeración de residuos: desde o uso de plantas de auga máis eficientes e melloras dos tratamentos de diálise, ata cambios nos sistemas de desinfección e no manexo de materiais plásticos. Medir e reducir a nosa pegada de carbono, fomentar a formación de profesionais e pacientes, e impulsar unha cultura ambiental na atención sanitaria son accións esenciais para transformar a nefroloxía nun motor de sostibilidade.
Neste Día Mundial do Ril, a mensaxe é clara: coidar os nosos riles, adoptar hábitos saudables, defender contornas sostibles e apoiar unha atención médica responsable son compromisos que nos benefician a todos. Só así poderemos garantir un futuro máis san, xusto e sostible, no que a saúde renal se converta nun dereito accesible para todos.
