Hai unha frase en medicina que di así: “non estás morto ata que esteas quente e morto”. A sentenza fala dos paradoxos da hipotermia, que pode aparentar unha morte que aínda non se produciu. E, polo visto agora, tamén é válido para os gatos.
O xornal The Washington Post sorprende hoxe con esta reportaxe que fala de Fluffy, unha gata da cidade de Kalispell, en Montana, nos Estados Unidos. Os donos de Fluffy atopárona ríxida e cuberta de grosos anacos de xeo e neve preto da súa casa a semana pasada.
Recollérona e inmediatamente levárona ao veterinario, que probablemente foi o que lle salvou a vida. “Estaba conxelada”, dixo Andrea Dutter, directora executiva da Clínica de Animais de Kalispell. A temperatura do seu corpo estaba por baixo do que podían ler os termómetros da clínica: 32 graos celsius.
A temperatura corporal interna normal dun gato está por riba dos 38 graos. “Inmediatamente comezamos a quentala”, dixo Dutter. “Auga quente, almohadillas térmicas, toallas quentes … e unha hora máis tarde recuperou a consciencia e comezou a miar”.
Unha vez que foi desconxelada, os veterinarios descubriron que o gato sufrira unha lesión que lle impediu regresar a casa e quedou conxelada baixo as temperaturas de ata 40 graos baixo cero que se rexistraron co movemento do vórtice polar nos Estados Unidos.
