Científicos de medio mundo seguen sen poder explicar unha estraña serie de movementos sísmicos que afectaron ao planeta o día 11 de novembro, e que foi recollido por sismógrafos de todo o mundo. Ata en Hawai, a 18.000 quilómetros de onde pareceu acontecer o episodio, preto do arquipélago de Mayotte, ao oeste de Madagascar, no Océano Índico.
“Creo que nunca vin nada coma isto“, declarou a National Geographic o sismólologo Göran Ekström, da universidade de Columbia, acerca do episodio do mes pasado. Esta situación veu precedida, seis meses antes, dunha especie de enxame sísmico na mesma zona: centos de movementos a 50 quilómetros da costa este de Mayotte.
This is a most odd and unusual seismic signal.
Recorded at Kilima Mbogo, Kenya …#earthquakehttps://t.co/GIHQWSXShd pic.twitter.com/FTSpNVTJ9B— ******* Pax (@matarikipax) 11 de noviembre de 2018
A mediados de maio, unha serie de terremotos que chegaron a acadar unha magnitude de 5,8 o día 15, foi o máis forte nunca rexistrado na zona. Porén, os enxames sísmicos, como os de menor magnitude acontecidos en Galicia este ano, non son necesariamente indicadores dunha situación perigosa. Investigadores da École normale supérieure de París suxiren que podería gardar relación coa actividade volcánica na zona, xa que estas illas de Mayotte teñen a súa orixe en erupcións.
A onda sísmica de novembro
E hai menos de tres semanas, aconteceu algo ben estraño: unha vibración estraña e longa que zuniu durante bastante tempo, sen os picos característicos dos habituais terremotos. Foi unha “sinal atípica de moi baixa frecuencia”, segundo o Bureau de Recherches Géologiques (BRGM) de Francia. Unha onda sísmica que se repetía cada 17 segundos, cunha duración duns 20 minutos en total.
“Hai moitas cousas que non sabemos, porque é algo bastante novo nas sinais das nosas estacións”, dixo a National Geographic o investigador Nicolas Taillefer, do BRGM. O misterio segue, pero xa hai hipóteses para intentar explicar o que aconteceu: fálase dun posible gran movemento de magma no Océano Pacífico.
Mayotte estase movendo
Esta idea refórzase con outros datos recollidos polos investigadores grazas ao GPS. Desde xullo, cando o enxame sísmico xa comezara, a illa moveuse seis centímetros cara ao leste e tres centímetros cara ao sur. Isto pode deberse aos posibles movementos de magma, aínda que ata o de agora non se puido confirmar.
“As observacións respaldan a hipótese de que hai unha combinación de efectos tectónicos e volcánicos, pero haberá que confirmala con posibles estudos”, declaran desde o BRGM.
