Decomisan marfil de mamut nunha tenda de Vigo

Dez mil anos despois da súa extinción, os cairos destes xigantes peludos volven ser obxecto de tráfico internacional

Fai 10.000 anos que os mamuts non camiñan sobre a face da Terra. Desapareceron de Europa no 12.000 a.C. Un milenio despois extinguíronse en América. Siberia foi o seu derradeiro reduto. E quedou unha penquena poboación dunha subespecie anana na illa ártica de Wrangel que chegou ata o 2.000 a.C.

Pero os cairos de mamut seguen a ser un produto comercial tantos milleiros de anos máis tarde. Rusia exportou no 2017 un total de 72 toneladas de marfil de mamut, con China como primeira compradora. E na república de Yakutia, aproveitando o desxeo da crise climática, extraen cada ano 100 toneladas de marfil destes extintos xigantes peludos.

Publicidade

Así que isto tamén tiña que chegar a Galicia, aínda que sexa ilegalmente. E a Garda Civil vén de incautar marfil de mamut nunha tenda de Vigo, onde tamén se vendían fósiles ou lanzas prehistóricas, xunto a pezas de animais en perigo de extinción.

Segundo informaron fontes do Instituto Armado, estas especies están amparadas polo Convenio sobre o Comercio Internacional de Especies Ameazadas de Fauna e Flora Silvestre (CITES). Durante a inspección do local, realizada por efectivos de Seprona de Vigo, con colaboración do Servizo Oficial de Inspección, Vixilancia e Regulación do Comercio Exterior ( OIVRE), localizáronse, entre outros especímenes, 462 cunchas de ameixa xigante, 446 pezas de coral, 79 cunchas de cefalópodos, 21 serras de peixe e 17 pulseiras de tartaruga Carey, todo iso sen a preceptiva documentación que acreditase a súa importación legal.

Entre o material decomisado hai restos de animais en perigo de extinción

Algunhas destas especies están consideradas en perigo de extinción, mentres que outras non o están, pero poderían estalo se non se controla e regula o seu comercio. Ademais desas pezas, no mesmo establecemento interveuse case medio milleiro de fósiles porque non se acreditou a súa legal posesión, e por incumprir a normativa relativa a patrimonio histórico, natural e biodiversidade.

Entre os fósiles intervidos identificáronse pezas de moluscos, equinodermos, os restos de marfil de mamuts, ademais de sete valvas de bivalvo Pinna Nobilis, unha ánfora romana do Século I, unha machada e dúas puntas de lanza de pedra prehistóricas.

Así que, milleiros de anos despois da súa extinción, os mamuts seguen a ser unha codiciada peza. Y, por certo, en Galicia só se conservan os restos dun destes xigantes. Apareceu nunha canteira de Lugo e podes velo no Museo de Historia Natural da Universidade de Santiago.

Un mamut nos montes de Lugo

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Doces de proteína de insecto e outros proxectos da UVigo xunto á Universidade do Minho

Un dos traballos da colaboración propón o uso de biosurfactantes prebióticos para aplicacións dérmicas

Vigo lidera unha investigación que permitirá fabricar con biocomposites no sector náutico

A empresa viguesa Amura pon en marcha o primeiro Centro privado de Investigación e Desenvolvemento no que se construirá un prototipo de embarcación integramente en liño

Como de accesible é a rúa na que vives? Compróbao neste mapa

A aplicación 'City Access Map' permite comprobar que servizos están a menos de 15 minutos camiñando nas cidades e areas metropolitanas de Vigo e A Coruña

O Simposio Nacional de Oncoloxía de Precisión insta ao impulso da terapia en Galicia

O evento acolle en Vigo a máis de 40 expertos os días 22 e 23 de febreiro