Descobren que un suposto círculo lítico prehistórico foi feito nos anos 90

A paisaxe da fotografía ben podería estar en Galicia, pero está ao leste de Escocia. Aquí, hHai pouco máis dun mes, os xornais escoceses daban conta dun curioso achado. “Un antigo círculo lítico que ficou descoñecido para os arqueólogos durante milleiros de anos acaba de ser recoñecido oficialmente”, contaba The Press and Journal. O suposto círculo prehistórico foi atopado nunha granxa de Alford, en Aberdeenshire.

Aínda que se conservaba nun sorprendente bo estado, ningún organismo reparara nel. As primeiras estimacións, segundo Neil Ackerman, un arqueólogo que asesoraba á área municipal de Aberdeenshire, apuntaban a que o monumento podería ter entre 3.500 e 4.500 anos de antigüidade. Porén, chamaba a atención que o tamaño das pedras do círculo era menor do habitual.

Publicidade

“Este abraiante achado enriquece o coñecemento destes monumentos únicos e o patrimonio prehistórico da zona”, dixo naquel momento Ackerman, engadindo que “é raro que estes sitios permanezan sen identificar por tanto tempo, especialmente nunhas condicións tan boas”. Algo xa facía dubidar aos investigadores. Porén, as autoridades locais xa quixeron destacar o potencial do achado. “Este novo lugar remarca a importancia internacional do patrimonio arqueolóxico de Aberdeenshire”, dixo a política local Moira Ingleby.

A verdade do círculo lítico

Non en tanto, ao recabar novos datos sobre o suposto monumento, apareceu a verdadeira historia. Ao contactar co antigo dono da leira onde apareceu o círculo para buscar máis información, o home confesou que el mesmo construíra a estrutura nos anos 90, como unha especie de homenaxe aos auténticos círculos líticos existentes en toda Escocia, segundo recolle The Guardian.

Ao escoitar aquilo, os investigadores rectificaron a tempo: “Obviamente é unha decepción, pero tamén lle dá valor ao lugar. Unha réplica tan exacta amosa o coñecemento, o compromiso e o aprecio que a comunidade lle ten á arqueloxía”, dixo Ackerman. O arqueólogo mesmo fixo unha brincadeira a través das redes sociais cando a historia comezou a circular. “Se estás tendo un mal día, polo menos non es ese home que identificou diante da prensa un círculo lítico prehistórico que realmente ten uns 20 anos de antigüidade”, escribiu.

“Espero que as pedras continúen a ser aproveitadas; aínda que non son prehistóricas, están nun lugar fantástico e paga a pena velas na paisaxe”, concluíu.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A Illa de Tambo, un tesouro arqueolóxico por descubrir: “Os achados apuntan a un complexo ermitán”

A Xunta deu permiso para desbrozar en San Fagundo, o punto máis alto de toda a illa. De momento atopáronse unha capela e restos do que podería ter sido outro inmoble

Arqueoloxía explicada a un científico e público interesado

O investigador Felipe Criado Boado, director do Instituto de Ciencias do...

Un estudo da UVigo atopa en Etiopía os restos de Homo erectus máis antigos do mundo

Sitúan por primeira vez a aparición destes homínidos e da tecnoloxía achelense hai dous millóns de anos

Así se conserva o ‘Titanic’ galego: “Parece que se afundiu onte”

O obxectivo da investigación Ría de Viveiro I é comprender como vivían as entidades poboacionais e a influencia do mar na súa evolución