O campo magnético da Terra protéxenos da radiación cósmica e dos ventos solares e, polo tanto, é fundamental para a vida no planeta. Malia o importante que é a súa función, non se pode ver nin escoitar. Ata agora. Un equipo da Universidade Técnica de Dinamarca foi capaz de tomar sinais magnéticos medidos pola misión Swarm da Axencia Espacial Europea (ESA) e convertelos en son. Para iso, fixeron público un audio que representa o campo magnético xerado polo núcleo da Terra e a súa interacción cunha tormenta solar. Podes escoitar aquí o son arrepiante:
Segundo explican dende a ESA, a misión Swarm está composta por tres satélites e foi lazanda ao espazo en 2013. O seu principal obxectivo é comprender como se xera o campo magnético terrestre. Para iso, mídense con precisión os sinais magnéticos que proveñen do núcleo, do manto, da cortiza e dos océanos, así como da ionosfera e a magnetosfera. “O proxecto é, sen dúbida, un exercicio gratificante que une a arte e a ciencia”, di o músico Klaus Nielsen, participante na iniciativa.
Ao abeiro do proxecto, instalaron 30 altavoces no chan da Praza Solbjerg de Copenhague. “Configurámolo para que cada altavoz represente unha localización diferente da Terra e demostre como o campo magnético flutuou nos últimos 100.000 anos”, apuntan dende a ESA. De feito, ao longo desta semana, os visitantes da praza puideron escoitar o aterrador son varias veces ao día. “É unha forma peculiar de recordar que o campo magnético existe e, aínda que o son é un pouco desconcertante, a existencia de vida na Terra depende del”, conclúen.
Se estas iniciativas aproximan o grande público á ciencia, perfecto.
Pero cientificamente o proceso de ‘convertelos en son’, non segue un criterio, é pura ficción.