Sabías que o 67% dos clientes opinan que unha boa imaxe de produto é o elemento decisorio para a elección de compra? Parece ser que no ámbito da política ocorre o mesmo. De acordo a unha investigación da Universidade de Lausana, o aspecto físico dos candidatos é determinante á hora de decidir o voto. Ademais, demostran que as opcións electorais dos maiores dependen en gran parte de criterios de selección que xa tiñamos de nenos.
O estudo efectuado polo profesor John Antonakis e un alumno, e que publica a revista Science, demostra que mesmo os nenos poden anticipar as decisións que tomarán os adultos á hora, por exemplo, de votar nunha eleccións, en base a simples fotografías dos candidatos.
A primeira parte da experiencia realizouse a principios de 2007, cando Antonakis presentou a 684 adultos sen relación coas eleccións francesas as fotografías de 114 candidatos á Asemblea Nacional gala en 2002. As fotografías mostráronse de dúas en dúas, poñendo xuntos a cada candidato elixido co seu opoñente derrotado.
“Aínda que priman os argumentos racionais, vémonos atrapados polas aparencias”
O resultado foi que en sete de cada dez casos, os enquisados elixiron o gañador real. En xuño de 2008, os investigadores efectuaron un segundo test, esta vez en forma de xogo e con 841 persoas, das que 681 eran nenos de entre 6 e 13 anos. Tras presentarlles os mesmos pares de fotografías, pedíronlles que elixisen entre cada dúas ao “capitán do barco” dunha viaxe ficticia entre Troia e Ítaca.
Tanto os 160 adultos como os nenos interrogados elixiron de novo, en sete de cada dez casos, aos deputados que realmente gañaron aquelas eleccións francesas. Os nenos, ademais, predixeron, sobre a base de fotografías, a dobre vitoria de Barack Obama, primeiro sobre o seu opoñente demócrata Hillary Clinton, e despois sobre John McCain nas eleccións presidenciais de EEUU.
Os autores do estudo consideran que estes datos subliñan a importancia do aspecto físico en actos tan transcendentais como unhas eleccións. De feito, lembran que isto xa foi demostrado polo investigador Alexander Todorov, de Princeton, pero o estudo suízo vai máis lonxe: os seus autores afirman que ao comparar as respostas de adultos e de nenos, demóstrase que as opcións electorais dos maiores dependen en gran parte de criterios de selección que xa tiñamos de nenos.
“Aínda que tamén conten outros argumentos máis racionais á hora de facer unha elección -afirma Antonakis– está claro que nos vemos atrapados polas aparencias”.
