A Cidade Tecnolóxica de Vigo (Citexvi) acolleu o mércores a presentación de dous proxectos innovadoras para axudar ás persoas maiores mediante as tecnoloxías máis avanzadas. No acto expuxéronse os resultados do proxecto Rising e os obxectivos de NETA V3A, apoiadas a través de dous consorcios formados por entidades galegas do sector.
“Son dúas ferramentas que lles permiten aos nosos maiores manter a súa independencia, á vez que dan tranquilidade ás familias e datos de importancia clínica aos profesionais sanitarios”, destacou Luis Barros, director de Innovación de Atendo, a empresa que encabezou os dous consorcios. Neste senso, subliñou tamén a necesidade de que Galicia sexa pioneira nestas iniciativas, debido á súa poboación envellecida e á alta porcentaxe de persoas que viven soas.
Proxecto Rising
Rising foi impulsado polo consorcio de empresas formado por Atendo, Fruto DS e Balidea, coa colaboración da Fundación Idis e o ITMATI (Instituto Tecnolóxico de Matemática Industrial) como centros de investigación, e céntrase no desenvolvemento da solución TIC denominada NETA para a aplicación de terapias cognitivas baseadas na vida cotiá e orientada a persoas que comezan a sufrir un deterioro cognitivo leve. Esta solución busca superar as barreiras habituais das persoas maiores coas novas tecnoloxías, proporcionándolles unha ferramenta especificamente pensada para elas, que facilite a súa adherencia ás terapias de maneira non invasiva, a través de técnicas de gamificación e fomentando a comunicación social coa súa familia e seres queridos. “Esa é xusto una das claves desta ferramenta, a comunicación emocional, a combinación dos vínculos afectivos, sociais e as actividades da vida cotiá xunto á supervisión sanitaria”, explicou Luís Barros.
Un robot asistencial
NETA compleméntase agora con NETA V3A, á fronte da que están tamén Atendo, Fruto DS e Balidea, xunto a Ledisson AIT e Gradiant como centro tecnolóxico asociado. Como continuación do proxecto anterior, vai conectar a plataforma NETA cun robot, mediante o cal as persoas maiores poderán comunicarse a través de voz. Desta maneira, o usuario poderá realizar accións como introducir ou consultar eventos no calendario (por exemplo, unha cita médica), facer videochamadas, realizar unha procura na internet, consultar e almacenar datos relacionados coa saúde como a tensión arterial ou os niveis de glicosa; ou solicitar información meteorolóxica.
Agora, o obxectivo xeral de NETA V3A é desenvolver un robot asistencial 100% galego que axude aos maiores para permanecer na súa contorna o maior tempo posible, fomentando hábitos de vida saudable, apoiando tratamentos farmacolóxicos e médicos, monitorando e ofrecendo seguridade. Á vez, preténdese que o robot non só cumpra cunha tarefa asistencial, senón tamén social, proporcionando acompañamento mediante Intelixencia Artificial, alentando a participación activa da persoa na súa contorna.
Os dous proxectos intégranse na chamada “economía prateada” (silver eoncomy) da que derivarán produtos e servizos para unha nova xeración de adultos maiores. Están subvencionados pola Axencia Galega de Innovación (GAIN) da Xunta de Galicia, que achegou 559.091 euros dun total de 1.118.000 euros, cofinanciados polo Fondo de Desenvolvemento Rexional (Feder) da Unión Europea.
Experimento con usuarios
Durante os últimos meses do proxecto, de setembro a decembro de 2018, realizouse unha proba piloto con usuarios reais, obtendo resultados moi satisfactorios. Destacou principalmente o alto grao de aceptación da solución por parte dos participantes. Tanto usuarios directos como familiares destacaron o seu fácil manexo. Pola súa banda, os especialistas subliñaron a capacidade para conseguir información dunha maneira non invasiva. “NETA é innovadora. Por unha banda, implementa terapias baseadas na vida cotiá e, doutra banda, conecta o ámbito social co sanitario, e iso cámbiao todo”, afirmou Luis Barros.
No acto do Citexvi tamén interviñeron M. Carmen López Pérez, responsable da oficina de I+D+i de Balidea; Carmen Blanco, técnica de Fruto DS; Óscar Rodríguez, director xeral en Ledisson AIT e Helena Fernández, Directora eSaúde de Gradiant.
