Ter o DNI galego será posible a partir do 25 de xullo, polo menos a través da rede. Con motivo da celebración do Día Nacional de Galicia, a asociación PuntoGal, que promove a utilización do dominio propio do país, pon en marcha a campaña “Celebremos a nosa identidade”. Entre outras iniciativas, a asociación poñerá a disposición de todos os internautas o Documento Galego de Identidade, que se poderá descargar a partir do vindeiro luns na web da entidade (www.dominio.gal).”Con esta acción lúdica, a asociación quere resaltar e visibilizar o orgullo de ser galego e de dispor dun dominio propio en internet como o .gal”, sinala a asociación na súa páxina web.
A asociación ofrece descontos nos novos dominios e anova a súa web
Ademais desta iniciativa, PuntoGal aproveitará o 25 de xullo para poñer en marcha una oferta para as webs que queiran rexistrar o dominio galego, por un prezo inferior a 20 euros (máis IVE). Nestas datas, a entidade tamén estrea nova apariencia na súa web, un “espazo dedicado á información sobre o prezo dos dominos, as campañas e ós rexistradores autorizados”, sinalan desde a asociación. Engaden que neste portal pode atoparse información “referente á normativa do dominio e as políticas de rexistro, unha táboa dinámica comparadora de prezos e servizos que ofrecen as preto de 40 empresas rexistradoras que traballan con .gal”.
