Cales son as vantaxes do 5G na industria? Así o estuda un equipo da UVigo

Os investigadores defenden que o uso de redes privadas permiten unha comunicación inmediata, estable e constante sen cables de por medio

“Queremos que as empresas coñezan de primeira man as melloras que poden lograr empregando as redes privadas 5G e que posibilidades lles abren estas novas tecnoloxías”. Así explica Felipe Gil, investigador do Centro de Investigación en Tecnoloxías de Telecomunicación da Universidade de Vigo (atlanTTIC) e profesor da Escola de Enxeñaría de Telecomunicación, o obxectivo principal do proxecto posto en marcha desde o Laboratorio 5G da UVigo sobre os beneficios para a industria destas redes privadas, un traballo no que contan coa estreita colaboración da empresa Cradlepoint, filial de Ericsson e líder mundial en solucións de redes sen fíos LTE e 5G entregadas na nube. 

“Buscamos gañar o maior coñecemento posible, tanto das vantaxes como das limitacións que teñen estas tecnoloxías para o desenvolvemento da Industria 4.0”, salienta Gil, recalcando a idea de que se trata de compartir coas empresas da contorna todo este coñecemento para poder axudarlles a tomar as mellores decisións. Trátase de achegar solucións para todo tipo de empresas, pero pensadas especialmente para os principais sectores locais, desde o industrial, coa automoción á cabeza, pasando pola loxística, o comercio, a sanidade ou a administración pública.

Publicidade

Desde o Laboratorio 5G, no que tamén participa a Xunta de Galicia a través de Amtega e Retegal, e co apoio de Cradlepoint, pretenden, neste primeiro semestre do ano, estar xa en disposición de amosar casos de usos típicos das redes privadas arredor do campus, así como simular un escenario idóneo onde se amosen novos casos de uso para esta tecnoloxía.

Eliminar cables e simplificar as instalacións

Similares ás redes privadas informáticas, as redes privadas 5G permiten crear unha rede de telecomunicacións para un uso específico dentro dun espazo concreto, tanto interior –unha fábrica, un almacén, etc.- como exterior –o campus, o porto, etc.-, pero sen cables de por medio, xa que as comunicacións se realizan a través de antenas e dispositivos 5G que se comunican entre si de xeito “inmediato, estable e constante”. Tendo en conta isto, as contornas industriais amósanse como un dos escenarios que máis se poden beneficiar do uso desta tecnoloxía sen fíos “robusta e con control de calidade das comunicacións”, recalca Gil, ao que engade que isto permitirá eliminar os cables en moitas máquinas, “simplificando as instalacións e posibilitando unha reconfiguración máis sinxela”, así como engadir máis elementos móbiles conectados “tipo robots ou elementos de transporte” e dotar aos operarios de terminais para intercambiar máis información e de máis calidade.

“Actualmente en España utilízanse as redes Wi-Fi para todo tipo de aplicacións, aínda que non sempre garanten unha boa comunicación en zonas extensas”

DANIEL MORROS, enxeñeiro de ventas de Cradlepoint España

Un caso común dentro das empresas de calquera sector é que o seu Wi-Fi teña problemas de escalabilidade, é dicir, problemas relacionados co feito de ter que soportar un gran número de dispositivos, de cobertura, debido ás restricións impostas por usar unha frecuencia compartida. En contraste, as redes privadas permiten que o número de antenas necesarias sexa moito menor ca nunha rede Wi-Fi, que a mobilidade sexa unha parte central da solución e que os dispositivos conectados non teñan colisións ao transmitir ou recibir datos. “Actualmente en España utilízanse as redes Wi-Fi para todo tipo de aplicacións, aínda que non sempre garanten unha boa comunicación en zonas extensas, cun gran número de dispositivos nos que é necesario asegurar a calidade dos servizos, e grazas a Cradlepoint é posible dispor dunha maior calidade de servizo, así como ofrecer servizos diferenciados ás comunicacións máis críticas por medio do network slicing”, explica Daniel Morros, enxeñeiro de ventas en Cradlepoint España. 

Longa traxectoria colaboradora

Desde o grupo de investigación GTI do centro de investigación atlanTTic contan cunha longa traxectoria colaboradora con empresas e institucións, a quen tratan de axudar para que poidan experimentar, tanto coas novas características e funcionalidades estándar das redes 5G, como na proposta e experimentación de novas funcionalidades que sexan de utilidade para as súas actividades. “Estamos traballando en dotar de dinamismo ás redes, en mellorar e validar as estratexias de slicing, edge computing,  reconfiguración dinámica das redes ou orquestación”, apunta o investigador vigués.

Gil explica que para validar o funcionamento real das redes privadas en contornas industriais é preciso contar con equipos profesionais e de calidade e por iso buscaron a colaboración con Cradlepoint, “unha das poucas empresas que está achegando solucións que cumpren estas características”, salienta o investigador, ao tempo que fai fincapé en que o dispositivo que están a empregar nesta investigación permite comprobar tanto as prestacións das redes privadas das contornas de proba, como comprender mellor as características “en canto a comunicación” dos distintos casos de uso e escenarios que se proban.

“O 5G, a primeira xeración de tecnoloxía sen fíos que ofrece aplicacións moito máis aló do uso exclusivo do consumidor, é unha ferramenta ideal na dixitalización da sociedade e, neste marco, as redes privadas tamén están cobrando forza porque permiten acceder a unha cobertura móbil 5G de alto rendemento en exteriores e interiores, o que as fai especialmente adecuadas para o sector industrial e para os campus educativos”, salienta pola súa banda Lorenzo Ruggiero, director de área para o sur de Europa en Cradlepoint, quen amosa o orgullo desta firma “por colaborar coa Universidade de Vigo no desenvolvemento de proxectos de innovación 5G”.


Podes ler a noticia do DUVI na seguinte ligazón.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A regulación térmica das aves podería ter a súa orixe nos dinosauros do Xurásico

Un estudo da UVigo pon de relevo o posible vínculo entre o clima e a evolución dos animais prehistóricos

A UVigo deseña un modelo para predicir os efectos do cambio climático na biodiversidade

Un equipo da Escola de Enxeñaría Forestal de Pontevedra desenvolve un sistema capaz de propoñer melloras que reduzan o risco de incendios e inundacións

Versace usa imaxes de nanopartículas de ouro obtidas na UVigo na súa nova campaña

A marca de luxo italiana baseouse no traballo do catedrático Luis Liz-Marzán para explorar o concepto de beleza a diferentes escalas, formas e lugares

Doces de proteína de insecto e outros proxectos da UVigo xunto á Universidade do Minho

Un dos traballos da colaboración propón o uso de biosurfactantes prebióticos para aplicacións dérmicas