Únete á nosa canle de Whatsapp
O xogo “O Mester”, deseñado polos alumnos do máster en Deseño, Desenvolvemento e Comercialización de Videoxogos, Carlos Balado Sánchez e Pablo García de los Salmones Gómez, vén de gañar a game jam “Afonso X e Galicia” convocada polo Consello da Cultura Galega (CCG) e máis pola Asociación Galega do Videoxogo. A entrega do premio, dotado con 250 euros en metálico, terá lugar, o vindeiro venres 16 de abril, ás 17:00 horas, na Igrexa da Universidade de Santiago de Compostela.
Tal e como explican os dous estudantes da Escola Politécnica Superior (EPS) do Campus de Ferrol, o videoxogo parte da tradición musical das Cantigas de Santa María e propón ás persoas usuarias retos musicais cos personaxes das ilustracións do Códice. Segundo indican desde o CCG, o xurado destacou que o proxecto galardoado “conta cunha ambientación musical e visual moi coidada e toques humorísticos que o converten nunha proposta atractiva que permite amosar o potencial das Cantigas de Santa María para seren incorporados a formatos e linguaxes do presente”.
Un encontro virtual
Ao fío da exposición “Afonso X e Galicia”, que se poderá visitar ata o próximo 24 de abril na Igrexa da Universidade de Santiago de Compostela, o CCG convocou, en colaboración con Videoxogo.gal, un encontro virtual de desenvolvedores para difundir este legado cultural entre o público máis novo botando man doutros soportes e linguaxes. Na game jam participaron tamén outros dous xogos, “Decimus”, de Xogon e Xurzo Diz, e “Alfonso X y las cuatro cantigas”, de macanaDEV.
O xurado estivo integrado pola profesora da Universidade da Coruña (UDC), directiva de Videoxogo.gal e socia de Imaxin|software, Luz Castro Pena, polo membro da Sección de Lingua e Literatura e Comunicación do CCG e editor da revista Morcego, Carlos Pereiro, e mais polo xornalista, profesor da Universidade de Santiago de Compostela (USC) e director da plataforma de divulgación culturagalega.gal, Manuel Gago.
