Galicia ten a peor velocidade de Internet en España. Os datos son do Ministerio de Enerxía, Turismo e Axenda Dixital, que no seu último informe revela as diferenzas entre a conexión coa rede nas diferentes comunidades autónomas. E Galicia está no furgón de cola do Estado. Un de cada tres galegos ten unha velocidade de menos de 10 Mbps. A Axenda Dixital Europea pretende que no 2020 toda a poboación da UE teña unha velocidade mínima de 30 Mbps, algo que está moi lonxe da realidade en Galicia a menos de tres anos vista.
Por provincias, a peor de España é Lugo, onde o 38,52 por cento da poboación ten unha velocidade menor de 10 Mbps. Segue a provincia de Ourense, cun terzo dos seus habitantes por baixo da cota dos 10 Mbs. Pontevedra (29,37%) e A Coruña (26,07%) pechan a clasificación galega. O peor dato é que as catro provincias galegas pechan a clasificación no Estado. A quinta pola cola é Teruel, co 22,78% cunha Internet de baixa velocidade.
Aínda que a Axenda Dixital Europea ten entre os seus obxectivos o levar internet a unha velocidade mínima de 30 Mbps ao 100% da poboación no ano 2020,, preto dun 25% da poboación española aínda non ten acceso a infraestruturas que permitan navegar pola rede a esa velocidade.
O escenario non queda aí porque a desigualdade territorial provoca que en polo menos 31 provincias, entre o 30% e o 65% da súa poboación non poida acceder a internet a través de banda ancha fixa aos 30 Mpbs establecidos na citada Axenda Dixital, segundo o último informe de cobertura de banda ancha do Ministerio de Enerxía, Turismo e Axenda Dixital. Neste caso, Toledo e Teruel son os territorios que contan coas peores porcentaxes, en ambos os casos, ao redor dun 65% da poboación.
Máis aínda, hai oito provincias nas que entre o 20% e o 40% da poboación non pode acceder a internet a máis de 10 Mbps. E catro delas son as galegas, ás que se suman Xirona, León, Santa Cruz de Tenerife e Teruel. De forma minoritaria, algo máis do 3% da poboación española non pode navegar pola rede a máis de dúas Mbps.
A dispersión da poboación galega está entre as razóns desta baixa velocidade en Internet, o que dificulta a cobertura en núcleos illados. Pero os datos do Ministerio de Enerxía, Turismo e Axenda Dixital non deixan dúbidas: Galicia ten a peor velocidade de Internet de toda España.
Aquí podes descargar
o informe sobre acceso a Internet do Ministerio de Enerxía, Turismo e Axenda Dixital
