Augas mineromedicinais do balneario de Mondariz
Augas mineromedicinais do balneario de Mondariz

Un libro recolle as propiedades terapéuticas das augas minerais de Galicia

Vademécum das augas mineromedicinais de Galicia acaba de saír á luz da man da Cátedra de Hidroloxía Médica da USC e da Asociación de Balnearios de Galicia. A obra pon a disposición do persoal médico información sobre as principais indicacións terapéuticas actuais das augas dos balnearios galegos, así como as súas contraindicacións, procedementos de aplicación e a súa dispoñibilidade nos diferentes centros termais da comunidade.

O libro consta de dúas partes: na primeira estúdase a importancia terapéutica das augas mineromedicinais, a súa clasificación e mecanismos de accións, indicacións, contraindicacións e vías e técnicas de administración, xunto a normativa legal que afecta ao sector; a segunda recolle información de cada un dos 21 balnearios de Galicia e das envasadoras de augas minerais naturais de Cabreiroá e Fontecelta.

Dos balnearios recóllese información sobre a composición, tipo de propiedades terapéuticas das augas; principais indicacións terapéuticas, técnicas de aplicación e perfil de pacientes atendidos; sobre a dirección médica, períodos de actividade, instalacións hoteleiras e como contactar, xunto a un pequeno resumo da súa historia.

Presentación do libro Vademécum das augas mineromedicinais de Galicia Foto: USC
Presentación do libro Vademécum das augas mineromedicinais de Galicia
Foto: USC

O reitor Juan Viaño asegura que este libro dá un paso importante na confirmación e recoñecemento do traballo que están a facer as empresas que se dedican en Galicia ao termalismo. Ademáis dí que a obra “destaca pola análise técnica da calidade das augas e do termalismo en xeral, grazas ás achegas de oito investigadores de recoñecido prestixio que dedican todo o seu talento a estudar os beneficios das augas mineromedicinais”.

Para a elaboración desta obra contouse coa colaboración do profesor Francisco Maraver e dos seus colaboradores da Escola Profesional de Hidroloxía Médica e Hidroterapia da Facultade de Medicina da Universidade Complutense de Madrid, Francisco Armijo, Icíar Vázquez, José Manuel Ejeda e Ana Isabel Martín; a catedrática de Hidroloxía Médica da Universidade da Coruña, Rosa Meijide; e do Laboratorio de Física Médica da Facultade de Medicina da Universidade de Cantabria, Carmen Ródenas.

Os balnearios dos que un se pode informar son de toda Galicia. Na provincia de A Coruña atópanse o de Carballo e o de Compostela (Brión). En Lugo están o de Guitiriz, as Termas Romanas de Lugo, Augas Santas (Pantón) e Río Pambre (Palas de Rei). En Ourense os de Arnoia, Baños de Molgas, Laias (Cenlle), Lobios, O Carballiño e Caldas de Partovia (os dous no Carballiño) e Cortegada. E na provincia de Pontevedra atópanse os de Acuña e Dávila (os dous en Caldas de Reis), Termas de Cuntis, Baños de Brea (Vila de Cruces), Caldelas de Tui, Hotel Balneario Isla de La Toja, Gran Hotel La Toja e o Balneario de Mondariz.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.