A Xunta de Galicia reclamou ao Goberno central que, polo menos nos municipios rurais, a telefonía móbil debe ser considerada un servizo universal, para non estar sometida a súa despregadura soamente aos criterios de rendibilidade das operadoras.
A Axencia para a Modernización Tecnolóxica de Galicia (Amtega) presentou ao Executivo do Estado as consideracións a ter en conta na futura regulación do servizo universal de telecomunicacións, en resposta á consulta pública aberta polo Ministerio de Transformación Dixital e Función Pública.
Na actualidade están considerados como parte do servizo universal as comunicacións fixas, con capacidade de banda larga a unha velocidade mínima de 10 Mbps, e os servizos de comunicacións vocais nunha localización fixa.
Como xa fixera en anteriores ocasións, no documento remitido ao Ministerio, a Xunta volve solicitar que a telefonía móbil de voz e datos sexa incluída no servizo universal, “ao menos nos municipios rurais e noutras zonas xeográficas con características sociais, económicas ou culturais especiais”. Cita como exemplos destas últimas o Camiño de Santiago, os parques naturais ou os grandes acontecementos.
Neste contexto, lembra que a necesidade de acceso a servizos de emerxencia en calquera situación e o potencial para a dinamización económica do rural fan que os servizos en mobilidade, tanto de datos como de voz, sexan “necesarios e imprescindibles”.
Amtega sinala na súa comunicación que é preciso incrementar a velocidade mínima de conexión ata os 100 Mbps, en liña coa Lei Xeral de Telecomunicacións, tendo en conta o mercado actual e o feito de que o programa UNICO Demanda Rural finaliza en 2027. Así mesmo, considera necesario establecer requisitos mínimos de garantía de caudal e calidade, incluíndo velocidade ascendente, latencia, jitter e perda de paquetes.
Estender a universalidade ás pemes
Ademais, co marco legal actual, o servizo universal só garante cobertura ás persoas físicas en vivenda habitual. Trasládase tamén a necesidade de incluír as microempresas, pemes, persoas autónomas e organizacións sen ánimo de lucro como beneficiarias do servizo universal con independencia da súa localización.
En relación co pago social, destinado a garantir que os consumidores con rendas baixas ou con necesidades sociais especiais poidan acceder aos servizos básicos de telecomunicacións, a Xunta coincide no interese de establecer esta obriga para todos os operadores e de definir o seu marco legal mediante unha normativa específica. Así mesmo, considérase necesario incluír os servizos en mobilidade de voz e datos entre as opcións do pago social.
Os PPodres q llo reclamen a Fraga: meteulle no c_u millóns de euros a Telefónica por repetidores vellos q non servían para nada.