Únete á nosa canle de Whatsapp
A empresa biotecnolóxica Origo Biopharma, con sede no Parque Tecnolóxico de Galicia (Ourense) e socia da Agrupación industrial Tecnolóxico Empresarial das Ciencias da Vida (Bioga) anunciou este martes o peche dunha rolda de financiamento Series Seed de 2,3 millóns de euros achegados por Sabadell Asabys, XesGalicia e os socios promotores. Con esta inxección de capital, a biotecnolóxica “cobre as necesidades financeiras para completar o desenvolvemento preclínico e iniciar os primeiros estudos clínicos co seu medicamento para o tratamento de pacientes con fibrose asociada á enfermidade de Crohn, así como avanzar os seus programas en Fibrose Pulmonar Idiopática e en cancro colorrectal”, expón Bioga nunha nota de prensa. A compañía foi fundada en 2017 por GalChimia (liderada pola súa CEO e fundadora, Carme Pampín) e por Julio Castro, fundador e CEO de Palobiofarma. En 2019, a compañía incorporou a Ramon Bosser como CEO e accionista.
Origo Biopharma desenvolve fármacos inhibidores de TGF-beta, unha diana terapéutica amplamente validada no campo da fibrose e da inmunoncoloxía, cunha tecnoloxía nova que permite evitar os efectos adversos asociados á inhibición desta diana e que tradicionalmente frearon o desenvolvemento desta clase de fármacos.
Só nos cinco principais países europeos (Alemaña, Reino Unido, Francia, Italia e España) o investimento preciso para afrontar o impacto da enfermidade de Crohn e da Fibrose Pulmonar Idiopática é de máis de 1.800 millóns de euros ao ano. Existe unha gran necesidade médica no tratamento da fibrose, xa que non existe ningún tratamento aprobado para a fibrose gastrointestinal e o 75% dos pacientes con enfermidade de Crohn avanzada necesitan cirurxía debido á fibrose, como lembra Bioga. Ademais, os fármacos aprobados para o tratamento da Fibrose Pulmonar Idiopática teñen un efecto moi limitado e a supervivencia media dos pacientes afectados é de entre 2 e 5 anos. Ademais da súa forma idiopática, a fibrose do tecido pulmonar é unha das secuelas que máis preocupan aos neumólogos nos pacientes que sufriron infección grave por Covid-19.
A inxección de capital permitirá a Origo Biopharma completar o desenvolvemento preclínico regulatorio do seu fármaco para fibrose gastrointestinal e realizar os primeiros ensaios clínicos orientados ao desenvolvemento en pacientes con fibrose asociada a enfermidade de Crohn, así como avanzar no desenvolvemento preclínico da súa molécula para o tratamento da fibrose pulmonar idiopática. Prevese iniciar os primeiros estudos clínicos no 2021.
Ramon Bosser, CEO da compañía, comenta: “Estamos moi satisfeitos co apoio de xestoras de capital risco coa experiencia de Asabys e XesGalicia, que, xunto con nosa nova achega, supoñerá un impulso moi importante para o avance dos proxectos de Origo, e senta unha moi boa base para a súa progresión futura”.
Pola súa parte, Clara Campàs, socia directora de Asabys Partners e presidenta do consello de administración de Origo, expuxo: “Origo Biopharma destaca pola excelencia científica e operacional do seu equipo fundador e directivo e, en liña coa nosa estratexia de investimento, desenvolve tratamentos disruptivos para necesidades médicas non cubertas como son a fibrose intestinal e pulmonar” engade Clara Campàs.
Fernando Guldrís, director xeral de XesGalicia engade: “Esta aposta por Origo Biopharma enmárcase na liña de traballo que seguimos nos últimos anos no ámbito da biotecnoloxía, baseada no apoio a iniciativas innovadoras lideradas por un equipo de recoñecida solvencia”.
Carme Pampín e Julio Castro, fundadores de Origo Biopharma, apuntan, pola súa parte, que “para nós é un orgullo formar parte deste proxecto desde o inicio e acompañalo no desenvolvemento da súa estratexia de crecemento. Esta nova etapa representa un gran fito para todo o equipo, ademais de ser un forte impulso para a consolidación de Origo Biopharma dentro do sector Biotech galego”.
