Biotecnoloxía: unha peza clave para o progreso científico e económico de Galicia

A ciencia afronta coa biotecnoloxía un gran desafío, pero tamén unha oportunidade con enormes posibilidades para mellorar a vida da sociedade. Esta disciplina baséase no conxunto de técnicas e tecnoloxías que empregan organismos ou partes deles, así como calquera outro tipo de tecnoloxías e disciplinas que poidan converxer con ela (informática, enxeñería, robótica, nanociencias, tecnoloxías de materiais, etc.) para ofrecer solucións creativas a problemas complexos. E neste sentido, o sector biotecnolóxico está chamado a ser un dos terreos con máis oportunidades de crecemento nos próximos anos e, para Galicia, é un dos eidos clave dentro da Estratexia de Especialización Intelixente (RIS3) da comunidade.

Así, a Xunta conta, desde 2016, coa Estratexia de Impulso á Biotecnoloxía 2020, que mobiliza 200 millóns en investimentos. Con esta estratexia xa se ten conseguido alcanzar os 258 millóns de euros de facturación en 2017, un 90% do obxectivo, fixado en 300 millóns de euros. Desde que se lanzou esta Estratexia tamén se fundaron 11 novas compañías do sector ‘biotech’, alcanzando o cento de empresas que se dedican en Galicia en exclusiva a producir biotecnoloxía, cun investimento en I+D de 37 millóns de euros, e xa se teñen creado 125 novos empregos no sector. Neste ámbito o principal obxectivo da Estratexia é seguir avanzando na captación de investimentos para que o sector continúe creando emprego de calidade na Comunidade.

Publicidade

Comunidade bioemprendedora

Galicia é a cuarta Comunidade máis bioemprendedora de 2017 e a primeira en volume de financiamento alcanzado polas empresas biotecnolóxicas, compañías que representan o 8,6% no conxunto de España e que empregan a 3.000 profesionais na Comunidade.

Galicia está a marcar fitos como contar coa primeira incubadora de fármacos de España da man da Fundación Kaertor e Janssen, un proxecto coordinado polos científicos Mabel Loza e Ángel Carracedo. Tamén está a impulsar cinco Unidades Mixtas de Investigación no sector bio nas que colaboran empresas da talla de Roche, Laboratorio Esteve, Jealsa-Escurís, Calvo ou Coren; e a próxima posta en marcha en Santiago, xunto coa Fundación Incyde, dunha aceleradora especializada no sector biotecnolóxico.

Ao tempo que se aposta por reforzar o sistema galego de saúde, avanzando en novos produtos e servizos para os cidadáns, a biotecnoloxía galega sitúase como unha tecnoloxía facilitadora e como valor engadido na industria galega, en sectores como a pesca, a agricultura, ou o ámbito sociosanitario.

A biotecnoloxía pode achegar solucións creativas para os sectores lácteo, pesqueiro ou sanitario

Neste sentido, as mellores oportunidades na biotecnoloxía galega están hoxe nos novos produtos e procesos para o sector lácteo; o aproveitamento dos recursos mariños e pesqueiros; a eficiencia na sanidade animal; a alimentación e o envellecemento activo; as novas tecnoloxías para medicina personalizada; ou a innovación aberta no descubrimento de fármacos.

A posta en marcha da Estratexia contou coa participación e colaboración de 66 axentes do sector entre empresas, universidades, fundacións, sistema hospitalario, centros tecnolóxicos e de investigación, clústers e asociacións e a propia Xunta que aposta por seguir nesta senda da colaboración e do traballo conxunto para dar o impulso definitivo a un sector no que Galicia está chamada a ser un referente.

A Estratexia de Especialización Intelixente afronta os dous próximos anos en Galicia co obxectivo de incidir nesa cohesión do ecosistema biotecnolóxico a través dos futuros Hubs de innovación dixital.

 

1 comentario

  1. Por que será que isto dia a panfleto da Xunta?
    Para começar, como pode Galiza ser pioneira representando o 8% dum setor, quando ise é exactamente a porcentagem que nos corresponderia por população no Estado??? Moi mal devem ir as cousas em outros setores…

DEIXAR UNHA RESPOSTA

Please enter your comment!
Please enter your name here

Este sitio usa Akismet para reducir o spam. Aprende como se procesan os datos dos teus comentarios.

Relacionadas

Observar as células para descifrar o cancro: a científica galega que volve a casa cun novo desafío

Sara Abalde-Cela inicia etapa no CiQUS co apoio do programa Oportunius e unha Consolidator Grant para desenvolver o proxecto OBSERVER

O historiador italiano que chega a Galicia para afondar na relación da Igrexa co medio ambiente

Marco Armiero intégrase no CISPAC a través do programa Oportunius da Xunta de Galicia tras recibir unha Advanced Grant polo seu proxecto

O Foro de Empresas Innovadoras recoñece a Unirisco polos seus 25 anos de apoio á transferencia

Dende a súa creación en 2001, contribuíu a levar máis de 40 proxectos científicos ao ámbito comercial, impulsando a colaboración entre universidade e empresa

Un proxecto galego permitirá que os bancos actualicen a súa criptografía sen cambiar os sistemas de pago

Qryption é unha iniciativa do centro tecnolóxico Gradiant pola que poderán centralizarse os sistemas criptográficos financeiros nun só punto de xestión, co apoio do programa Ignicia da Xunta de Galicia