As aves mariñas son unha das bases da riqueza do ecosistema das Illas Cíes. A súa actividade determina moitos aspectos da flora e da fauna e procesos ecolóxicos no arquipélago, tal e como demostran decenas de estudos realizados alí. Para poñer de manifesto esta importancia, a candidatura que impulsa ás Cíes cara ao Patrimonio da Humanidade da Unesco celebra este mércores unha nova charla divulgativa no Mercado do Berbés.
A actividade, de acceso libre e gratuíto, comezará ás 20.30 horas deste mércores 24. Baixo o título “Aves mariñas e procesos ecolóxicos nas Illas Cíes”, intervirán Alberto Velando, investigador do departamento de Ecoloxía e Bioloxía Animal da Universidade de Vigo, e Carlota Barañano, do Comité de Candidatura das Illas Cíes ao Patrimonio da Humanidade.
