Venres 29 Marzo 2024

Unha investigación galega proba como as bacterias bucais poden promover o cancro de colon

Analizan un microbio que produce infeccións orais e viaxa aos tumores, colaborando en facer un ambiente adecuado para o desenvolvemento das células canceríxenas

A saúde bucodental está directamente relacionada co desenvolvemento dos tumores colorrectais. Esa é a hipótese que un grupo de investigadores e investigadoras do Instituto de Investigación Biomédica da Coruña (INIBIC), da Universidade da Coruña e do seu complexo hospitalario veñen demostrando estudo tras estudo. Desta volta, acaban de mandar a revisión o seu último traballo de investigación á prestixiosa revista Microbiome e no que demostran que unha bacteria que produce infeccións orais como a periodontite é quen de viaxar aos tumores de colon, colaborando en facer un microambiente adecuado para o desenvolvemento das células canceríxenas.

“Vimos detectando que hai bacterias perigosas que favorecen o desenvolvemento das células canceríxenas nos tumores colorrectais”

MARGA POZA, microbióloga investigadora no INIBIC e profesora da UDC

Esta bacteria que veñen de analizar chámase Parvimonas micra e, na boca, atópase en rexións subxinxivais anaerobias (sen exposición ao osíxeno) e tamén nos tumores do intestino. Grazas ao apoio que lles brinda o Ministerio de Sanidade a través do Instituto de Saúde Carlos III e a Asociación Española Contra o Cancro, este equipo ten acceso a mostras de máis de 140 pacientes que padecen cancros de colon. Téñenas de gánglios, metástases, tumores e, por suposto, saliva. “Como microbiólogos, adicámonos a describir microbios. En consonancia coa literatura científica, vimos detectando que hai bacterias perigosas que poden, efectivamente, favorecer o desenvolvemento e a prosperidade das células canceríxenas nos tumores colorrectais”, detalla Marga Poza, investigadora no INIBIC, profesora da UDC e unha das asinantes deste traballo.

Publicidade

Esta bacteria “perigosa” é sensible á exposición ao osíxeno e isto complexiza o traballo deste grupo de mircobiólogos, xa que se sae dese ambiente anaerobio, morre inmediatamente. Isto é clave no seu desenvolvemento porque, a través do torrente sanguíneo ou do aparato dixestivo, a Parvimonas micra viaxa dunha zona subxinxival carente de osíxeno á outra con condicións similares nos tumores. “Descubrimos que non só se despraza, senón que no tumor está activa e excreta substancias que son factores de virulencia. Fai que o microambiente tumoral sexa máis adecuado para o desenvolvemento das células canceríxenas”, explica a investigadora do Instituto de Investigación Biomédica da Coruña.

“Descubrimos que, no tumor, a bacteria está activa e excreta substancias que son factores de virulencia”

MARGA POZA, microbióloga investigadora no INIBIC e profesora da UDC

Mais non só constataron ese adecuamento que favorece o desenvolvemento dos tumores colorrectais. No mesmo estudo, evidencian que, na súa viaxe a través do organismo dende a boca ata o colon, a bacteria sofre cambios adaptándose, dalgún xeito, ao ambiente tumoral.

Resumo gráfico do traballo deste grupo de investigación

Suxerencias para próximos estudos

Outro dos aportes deste paper que forma parte tamén da tese da investigadora Kelly Conde Pérez é a suxerencia de que, o máis probable, é que esta bacteria non viaxe soa dende a boca ata o recto. “Todo apunta a que hai máis bacterias que se benefician de viaxar en conxunto e sinerxeticamente”, argumenta Poza. “Todas estas bacterias forma agregados e se benefician, por exemplo, para se defender do sistema inmunitario“, engade. Isto garda unha gran relevancia á hora de abordar tratamentos e métodos de prevención: “A conclusión é que, neste sentido, non nos podemos centrar só nunha desas bacterias”, remata.

Sobre o INIBIC

O Instituto de Investigación Biomédica da Coruña (INIBIC) é un Instituto de Investigación Sanitaria constituído pola Consellería de Sanidade, o Servizo Galego de Saúde (Sergas), a Universidade da Coruña e a Fundación Profesor Novoa Santos. Foi creado o 31 de xaneiro de 2008 mediante a firma dun convenio de colaboración entre as entidades asinantes. Tras un período de desenvolvemento da súa actividade e mellora dos seus procesos, obtivo a acreditación como IIS por parte do Instituto de Saúde Carlos III o 10 de marzo de 2015.

Neste proxecto tamén colabora o equipo de microbioma oral do FISABIO, a Clínica Pardiñas, os servizos de Anatomía Patolóxica, Oncoloxia, Microbioloxia, Biobanco e Ciruxia do CHUAC.


O artigo científico do que nace esta información pódese consultar nesta ligazón da Research Square baixo o título Evidence for translocation of oral Parvimonas micra from the subgingival sulcus of the human oral cavity to the colorectal adenocarcinoma. Esta é unha preimpresión, aínda non foi revisado por pares pola revista.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

‘Skincare’, cuestión de saúde? : “Hai que diferenciar entre dermatoloxía e cosmética"

O experto Juan García Gavín apunta que aínda unha gran parte da poboación cre que o coidado da pel provén do mero interés estético

O sarampelo rexorde con forza en Europa: que podemos facer?

https://theconversation.com/javascripts/lib/content_tracker_hook.js *Un artigo de As autoridades sanitarias portuguesas confirmaron un novo caso de...

Confirmado: fumar prexudica as defensas incluso anos despois de deixalo

O tabaquismo produce alteracións na inmunidade innata e adaptativa, así como cambios epixenéticos que se manteñen durante décadas

De beber? Auga, pero que sexa reciclada, por favor

https://theconversation.com/javascripts/lib/content_tracker_hook.js *Un artigo de Quizais aínda non o saiba pero, do mesmo...