Segundo positivo por coronavirus en Galicia en menos de 24 horas. Un paciente cun cadro de pneumonía en Vigo, que tiña viaxado ao norte de Italia nas últimas datas, deu positivo no kit de control polo COVID-19 e agora os resultados foron enviados a Madrid para a súa confirmación.
O paciente de entre 40 e 50 anos foi ingresado por pneumonía no Álvaro Cunqueiro deu positivo na proba do coronavirusen primeira instancia. Tal e como dita o protocolo, o Sergas está á espera de que o Centro Nacional de Microbioloxía situado en Majadahonda realice un diagnóstico definitivo, que se espera que chegue nas vindeiras horas.
“En Galicia, de momento, non circula o coronavirus”, di Sanidade
Con todo, como medida preventiva, os responsables sanitarios enviaron aos seus domicilios a seis enfermeiras e un médico internista que estiveron en contacto co enfermo.
Estes traballadores sanitarios terán que estar illados nos seus domicilios o próximos catorce días se os resultados do paciente rematan por ser positivos. Segundo fontes sanitarias, o paciente tivo algún contacto co norte de Italia nas últimas dúas semanas.
