Únete á nosa canle de Whatsapp
Desde que en 1771 o médico Hieronymus David Gaubius presentase á comunidade científica occidental un medicamento moi prometedor, o cinc converteuse en obxecto de numerosas pescudas e estendeuse nos estantes das farmacias e tendas especializadas. No século XIX era habitual no tratamento da epilepsia e, despois dun tempo de ostracismo, reapareceu desde os anos 60 do século XX como suplemento alimenticio e un trastorno hereditario chamado enfermidade de Wilson.
Hoxe seguen estudándose as súas propiedades beneficiosas, e así se amosa nunha metaanálise que estudou 28 ensaios, que fortalece a idea de que o uso de suplementos de cinc podería previr os síntomas e acurtar a duración das infeccións respiratorias virais, como as catarreiras comúns ou a gripe.
“Adoita crese que o papel do cinc na prevención e tratamento de infeccións é só para as persoas con deficiencia deste elemento, pero os nosos achados realmente desafían esta crenza”, explica a investigadora Jennifer Hunter, da Universidade de Western Sydney (Australia).
A metaanálise recolle, por exemplo, dous grandes ensaios realizados na China, nos que se observou que o aerosol nasal de cinc en doses moi baixas reduciu o risco de enfermidade clínica. Outros ensaios máis pequenos nos EUA avaliaron os efectos do cinc por vía oral excluíndo ás persoas con deficiencia do elemento. Ademais, a meirande parte dos traballos que analizaron os efectos deste composto fixéronse en poboacións nos que as deficiencias de cinc son moi raras.
Ao tomar cinc como medida preventiva, a revisión observou que había un 28% menos de risco de desenvolver síntomas máis leves e un 87% menos de risco de síntomas graves. Ao tomalo despois de enfermar, viuse que o elemento reduce lixeiramente a duración dos síntomas, nunha media de dous días. Con todo, os autores do traballo advirten de que a subministración a posteriori ten un efecto escaso. E insisten en que é precisa máis investigación, mesmo para afondar na posibilidade de que funcione contra novos virus como o SARS-CoV-2.
Referencia: Zinc for the prevention or treatment of acute viral respiratory tract infections in adults: a rapid systematic review and meta-analysis of randomised controlled trials (Publicado en BMJ Open).
