Equipo dirixido por Luisa María Seoane, no centro. Foto: USC.
Equipo dirixido por Luisa María Seoane, no centro. Foto: USC.

Científicas galegas descobren o potencial anti-obesidade dun fármaco para o intestino

Unha investigación demostra as propiedades terapéuticas do linaclotide, que adoita usarse para a síndrome do intestino irritable

O linaclotide era ata agora un fármaco usado no tratamento da síndrome do intestino irritable, unha doenza que afecta a entre o 10 e o 20% da poboación española. Pero a través do chamado reposicionamento de fármacos, un equipo de científicas galegas estudou e atopou que pode ter unha nova e relevante función no tratamento contra a obesidade. Así o expón o traballo no que participou o grupo dirixido por Luisa María Seoane, investigadora principal do Centro de Investigación Biomédica en Rede da Fisiopatoloxía da Obesidade e Nutrición (CIBEROBN) e líder do grupo Fisiopatoloxía Endocrina do Instituto de Investigacións Sanitarias (IDIS), e no que tamén tomou parte o equipo de Rubén Nogueiras, do CiMUS.

Os resultados, publicados pola revista Neuroendocrinology, evidencian que a administración deste composto por vía oral en animais de experimentación activa a graxa parda ou graxa boa, aumenta o gasto enerxético e, en consecuencia, a perda de peso sen afectar á inxesta de alimentos. Ademais, a obtención do composto a través da fórmula do reposicionamento achega múltiples vantaxes ao desenvolvemento do medicamento, aforrando tempo, custos e riscos ao permitir comercializar un mesmo fármaco para diferentes usos terapéuticos e patoloxías.

O  linaclotide utilízase actualmente para tratar o estrinximento asociado á síndrome de intestino irritable. Pero o consumo deste fármaco nunca se relacionou coa perda de peso. Segundo este estudo, o medicamento activa a mesma vía de sinalización que unha substancia producida de forma natural polo intestino humano, a uroguanilina.

Científicas de Santiago sinalan unha nova proteína contra a obesidade

Datos previos demostraran que a administración directamente no cerebro de uroguanilina a animais obesos actuaba sobre un mecanismo cerebral que activa a graxa parda. “A maior limitación destes traballos precedentes viña dada porque a administración cerebral non é unha opción válida en humanos”, sinala Luisa María Seoane. “O que agora describimos é que o linaclotide administrado de forma oral activa un mecanismo no cerebro que provoca a perda de peso en modelos preclínicos obesos de roedores sen afectar á inxesta de alimentos”, engade a investigadora.

Este medicamento só foi probado en ratos e os seus efectos non foron corroborados aínda en pacientes. Se o efecto beneficioso do linaclotide sobre a perda de peso corporal en modelos preclínicos puidera confirmarse en humanos, suporía que o devandito fármaco pasaría a ter un segundo uso diferente do que na actualidade ten, ampliando as súas posibilidades terapéuticas ao campo da obesidade e enfermidades asociadas. Esta investigación é consecuencia do desenvolvemento dun proxecto financiado polo Instituto de Saúde Carlos III.


Referencia: Oral pharmacological activation of hypothalamic guanylate cyclase 2C receptor stimulates brown fat thermogenesis to reduce body weight (Publicado en Neuroendocrinology).

1 comentario

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.