Alén do impacto das decisións que toma o Goberno español e a Xunta, e que afectan en maior medida a Galicia, moitos cidadáns galegos, debido á proximidade á raia, están mirando cara a Portugal durante esta crise provocada pola pandemia do coronavirus SARS-CoV-2. Hai 9 días, o domingo 8 de marzo, o goberno luso decidiu prohibir as visitas aos hospitais da rexión Norte, ademais de decretar o peche dalgunhas facultades universitarias, medidas que se tomarían en Galicia entre o 10 e o 13 de marzo.
Nos primeiros días da crise, a preocupación estaba en municipios como Felgueiras ou Lousada, moi preto de Guimarães, onde se detectaron os primeiros focos con casos confirmados e as medidas máis estritas adiantáronse ao resto do país. Naquel día, mentres que en moitas partes de España non se falaba aínda de transmisión comunitaria, a Direção-Geral da Saúde (DGS) recoñecía “seis cadeas de transmisión” activas dentro do país, e as cámaras municipais comezaron a anunciar a suspensión de eventos multitudinarios.
Desde o comezo da crise, foi salientable a comunicación dos datos públicos sobre o número de persoas afectadas que difundiu a DGS. A pesar das críticas -“non estabamos preparados para que o virus nos atinxira con esta magnitude”, recoñeceu esta semana a ministra de Saúde, Marta Temido-, o nivel de detalle da evolución das cifras difire bastante do publicado en Galicia e España.
Aínda que a taxa de persoas afectadas con positivo confirmado no país veciño segue sendo menor ca en Galicia e España, (na actualidade hai 448 positivos confirmados e unha persoa falecida) as cifras oficiais fan tamén fincapé en detalles que non se están a comunicar noutras zonas: os contactos en vixilancia por parte das autoridades, a súa idade e xénero, os síntomas cos que foron atendidos e o tipo de contaxio (importado ou transmisión comunitaria).
Alén disto, nos últimos días estase multiplicando o número de casos sospeitosos, pasando en seis días de 471 a 4.030. Segundo o glosario do plan de continxencia publicado pola DGS, considérase casos sospeitosos todas aquelas persoas que cumpran cos criterios clínicos, de laboratorio ou epidemiolóxico dunha doenza, neste caso a Covid-19.
Con todo, e na liña do que suxiren investigacións como a publicada por Science este luns, respecto á alta porcentaxe “non documentados” de casos en Wuhan, as autoridades sanitarias portuguesas botan a vista bastantes semanas atrás na procura da posible presenza do virus no país. Así, a data que se contempla como punto de partida para o criterio de casos sospeitosos é do 1 de xaneiro de 2020. Deles, 3.259 entran na categoría de “non confirmados”, e 323 seguen agardando polo resultado da análise. Ademais, segundo o boletín deste martes, 6.852 están baixo vixilancia das autoridades, e son 19 as cadeas de transmisión activa das que ten constancia a DGS, segundo os datos publicados.
Os síntoma principais entre estas persoas son a tose (33%) e a febre (27%), seguidas das dores musculares, a cefalea, o cansazo xeral e a dificultade respiratoria.
Para consultar todos os detalles que achega a DGS, pode visitarse o seu portal web.