Un equipo de científicos chineses describiu a estrutura completa da proteína ACE2, que usa o coronavirus para entrar nas células humanas, o que pode facilitar o desenvolvemento de posibles terapias antivirais.
O estudo, que publicou a prestixiosa revista Science este mércores, está asinado por investigadores de tres institucións de China, o país onde se detectou por primeira vez o coronavirus SARS-CoV-2, causante da pneumonía COVID-19, en decembro pasado.
“O noso descubrimento non só bota luz para comprender a mecánica da infección viral”, din os autores do estudo citados por Science, senón que “tamén facilitará o desenvolvemento de técnicas de detección do virus e posibles terapias antivirais”.
O equipo, encabezado por Renhong Yan, do Instituto Westlake de Estudos Avanzados, analizou e describiu, con criomicroscopia electrónica (Cryo EM), a estrutura da proteína ACE2, a cal non se coñecía totalmente ata o de agora. É a esta proteína á que o novo coronavirus “secuestra” para entrar nas células humanas unida a unha proteína da membrana celular.
Este coñecemento de como se une SARS-CoV2 á superficie da célula pode proporcionar unha base para o desenvolvemento terapéutico, indican os autores do estudo.
Cando o coronavirus infecta a unha persoa, o primeiro paso do proceso parte dunha proteína do virus, a proteína de pico (S), que se vincula ao receptor humano dunha encima conversiva da anxiotensina 2 (ACE2).
A estrutura da proteína S xa foi descrita nun estudo precedente publicado por investigadores estadounidenses tamén en Science o pasado día 19.
ACE2, indican os autores, é o punto de entrada ás células humanas para SARS- CoV2 , por iso entender a súa estrutura completa é clave para os esforzos de para lograr terapias específicas para o COVID-19.
Aquí podes consultar o artigo publicado por Science
