A febre, a dor muscular e a fatiga son tres dos síntomas máis comúns da gripe. Os casos deste virus respiratorio están a aumentar en Galicia segundo a Consellería de Sanidade e agárdase que se acade o pico entre o 20 e o 26 de xaneiro. Así o corroboran os datos do último Informe de actividade das infeccións respiratorias agudas en Galicia: esta semana ingresaron 107 persoas con gripe, un 55% máis que no período anterior. As consultas tamén se incrementaron nun 29%. Con todo, dende Sanidade prognostican que a onda epidémica deste ano se manteña “no nivel baixo de intensidade”.
“Aínda non sabemos como vai ser o pico. Hai que esperar para valorar a virulencia”, indica a catedrática de Inmunoloxía da Universidade de Vigo África González. A experta traslada a sensación de que hai unha gran cantidade de persoas con arrefriados leves, mais non cun curso grave de enfermidades respiratorias. Porén, cre que é cedo para valorar a tempada de virus, especialmente da gripe, dado que aínda está a comezar o inverno, a estación na que se dan máis casos de influenza. O aumento de contaxios, di González, tamén está relacionado coas reunións familiares e a volta a colexios, universidades e traballos despois das vacacións de Nadal.
O maior incremento, tanto nas hospitalizacións como nas consultas, estase a experimentar nos maiores de 80 anos. En relación aos ingresos, houbo un aumento en todas as áreas sanitarias agás en Ferrol e e Pontevedra. En toda a tempada notificáronse 313 hospitalizacións e a maioría delas, 187, positivas no virus do tipo A.
Modelo de predición da gripe
Todos estes datos pódense recompilar a través do labor de control da Consellería de Sanidade, que recaba a información a través das consultas en atención primaria, de resultados das probas microbiolóxicas para o diagnóstico da gripe e doutros virus respiratorios, como o SARS-CoV-2 e o respiratorio sincitial, e os ingresos hospitalarios. A isto súmase os datos de venda de antigripais das 70 farmacias sentinela que están comezando a operar a ofrecer información para un prognóstico máis fiable.
Segundo o modelo de predición, e tal e como recolle o informe, é esperable que a taxa de consultas aumente nas próximas dúas semanas pero sen que isto implique unha maior gravidade da onda epidémica. “A gripe é un virus respiratorio estacional moi asociado coa época do frío. A vacina deste ano cobre tres cepas e a idea non é evitar os contaxios ou a enfermidade, senón protexer contra a sintomatoloxía grave”, lembra González. Isto mesmo ocorre coas vacinas da covid.
Con todo, aínda non se coñecen os datos totais de vacinación contra a gripe en Galicia. Segundo lembraba o conselleiro de Sanidade esta semana, a campaña remata o 18 de xaneiro e será a partir de aí cando se faga balance. A última actualización da Xunta apuntaba a máis de 760.000 persoas vacinadas fronte á gripe. A taxa nos maiores de 65 anos, a poboación diana da campaña, acada o 75%. Observando os datos segundo as franxas etarias, menos do 50% da poboación de entre 60 e 69 se vacinou; o 70% de entre 70 e 79; e preto do 85% dos maiores de 85 anos. En canto ás embarazadas, a porcentaxe foi de máis do 35%.
